Tenistët rusë dhe bjellorusë do të mund të garojnë në turneun Grand Slam “Wimbledon” në këtë verë, pasi u është hequr pezullimi i fuqizuar vitin e kaluar.
Lojtarët do të mund të paraqiten si “sportistë neutralë” dhe do të garojnë në përputhje me disa kushte.
“Të pajtohen që të mos e përkrahin shtetin e Rusisë apo Bjellorusisë, regjimin apo liderët e tyre, si dhe të mos pranojnë të ardhura nga shteti i Rusisë apo Bjellorusisë, përfshirë edhe të ardhurat nga sponsorizimet e kompanive që operojnë apo kontrollohen nga ata”, janë kushtet të cilat duhet t’i plotësojnë tenistët rusë e bjellorusë, në mënyrë që të luajnë në turneun prestigjioz.
Ata ishin të pezulluar nga viti i kaluar për shkak të pushtimit që Rusia e nisi në Ukrainë, e që u përkrah nga Bjellorusia.
“Wimbledoni” nis më 3 korrik.
Daniil Medvedev, Andrey Rublev dhe Daria Kasatkina që janë në top 10-shen e ranglistës te meshkujt e te femrat, janë prej emrave që mund të luajnë këtë verë.
Numri dy i botës te tenistet, Aryna Sabalenka nga Bjellorusia, e cila e fitoi turneun “Australian Open” më herët gjatë këtij viti, po ashtu pritet të paraqitet në garë.
