Besa Famgas e Prishtina nuk kanë hasur telashe për të kaluar në finale të plejofit në Superligën e Kosovës në hendboll në konkurrencë të meshkujve.
Të dy skuadrat finalen e kanë siguruar të martën, kur u luajtën ndeshjet e dyta të serisë gjysmëfinale të plejofit. Besa Famgas, që po dominon plotësisht hendbollin kosovar, ka kaluar në finale pas dy fitoreve të thella ndaj Vëllaznimit të Gjakovës.
Besa stinorin e rregullt e ka përfunduar në pozitën e parë duke i fituar të gjitha ndeshjet. Në fundjavë në Pejë, Besa fitoi me shifrat 40:19, ndërsa mbi 40 gola i shënoi të martën në Gjakovë, kur fitoi me 49:23. Hendbollistët pejanë, Yll Muqolli, Egzon Gjuka e Jon Muqolli shënuan secili mbi dhjetë gola për të udhëhequr Besën drejt fitores dhe finales.
Bindëse ishte edhe Prishtina në përballje me Trepçën. Pasi ndeshjen në kryeqytet e kishte fituar me shifrat 40:26, Prishtina të martën fitoi edhe në “Minatori”. Rezultati ishte 40:27 në të mirë të Prishtinës. Aloja Agon Bajqinovci ishte më efikasi duke realizuar 14 gola.
Besa Famgas e Prishtina do të takohen në finale, ndërkohë që ekipi pejan është favorit i madh.
Por prej të mërkurës skuadrat nuk do të jenë të kompletuara. Të mërkurën grumbullohet përfaqësuesja e Kosovës, ndërsa si Besa ashtu edhe Prishtina kanë shumë lojtarë në përfaqësuese. Kosova synon sukses historik – kualifikimin në Evropian. Për këtë i duhet fitorja ndaj Malit të Zi, pas një jave në Prishtinë. Hendbollistët po ëndërrojnë për suksesin e madh, falë fitores ndaj Rumanisë në Bukuresht, muajin e kaluar.
