“I paharrueshëm”, tha sulmuesi Roberto Soldado, duke kujtuar golin e tij të parë profesional që shënoi.
Një goditje me kokë kundër Olympiacosit nga një krosim i David Beckhamit, e mbajti të gjallë Real Madridin në Ligën e Kampionëve në vitin 2005, duke i bërë vetes vend të jetë në grumbullim me Roberto Carlosin, Raulin, Sergio Ramosin dhe Robinhon. Tani, 16 vjet pas ndeshjes së tij të parë në garat evropiane, 35-vjeçari Soldado po përpiqet të shtyjë edicionin e tij të fundit. Ditët e “Galaktikëve” kanë kaluar prej kohësh pasi ai shpreson të shënojë një nga fitoret më të mëdha në historinë e ekipit modest nga La Liga, Granada kundër Manchester Unitedit në çerekfinalen e Ligës së Evropës, ndeshjen e parë që luhet të enjten mbrëma.
“Ne nuk e dimë sa vite mund të duhen që ky klub të luajë përsëri në Evropë dhe nuk e di nëse do të luaj ndonjëherë në Evropë përsëri”, pranoi Soldado. “Ne të gjithë duhet ta shfrytëzojmë në maksimum këtë mundësi të artë që e kemi para vetes”.
Soldado ka luajtur për tetë skuadra në tri vende të ndryshme në karrierë, duke përfshirë këtu Real Madridin, Tottenhamin dhe Fenerbahçen. Asnjë ekip spanjoll nuk është ngjitur aq shpejt sa Granada, e cila përfundoi e dhjeta në divizionin e dytë të Spanjës tre vjet më parë dhe këtë edicion të udhëhequr nga trajneri Diego Martinez janë në prag të serisë gjysmëfinale të Ligës së Evropës.
“Qëkur ai arriti, klubi është ngritur dhe ka vazhduar përpjetë”, u shpreh Soldado, i cili ka shënuar 11 gola këtë sezon.
Martinez ishte vetëm 37-vjeçar kur e mori drejtimin e Granadas dhe tani vlerësohet si trajneri më i talentuar dhe i ardhshëm i Spanjës.
“Të gjithë u futën në anije me të, të gjithë e vendosin veten në shërbim të ekipit, ky është identiteti i Granadas”, insistoi Soldado. “Pavarësisht se sa vjeç jemi, ne punojmë njësoj dhe për të njëjtën gjë. Nuk ka asnjë ego. Unë përpiqem të kontribuoj me përvojat që kam pasur, por kam të njëjtën dëshirë të mësoj si një i ri. Ne e dimë që jemi klub i vogël, por kemi ambiciet e një gjigandi”.
Granada në çerekfinalet e Ligës së Evropës përballet me një kolos si Manchester Unitedi, klubi i katërt më i pasur në botë kundër të katërtit më të varfër në La Liga. Ndeshja e parë luhet në Granada derisa ajo e kthimit në stadiumin “Old Trafford”.
“Ata kanë lojtarë të shkëlqyeshëm, jo vetëm një ose dy, por disa, individualisht ata janë shumë më të mirë se ne”, tha Soldado. “Por forca jonë është ekipi dhe këtu duhet të ndihemi superiorë. Ajo që duhet të ëndërrojmë është që ne të mund të eliminojmë Manchester Unitedin”.
Soldado e di ndjenjën se si është të mposhtësh një ekip si Manchester Unitedi. Në fakt, paraqitja e tij e fundit kundër Unitedit ishte kur ai luante për Tottenhamin, dhe ekipi nga Londra triumfoi 2:1 në ditën e parë të vitit 2014.
“E mbaj mend shumë mirë, ishte 1 janari dhe një natë para asaj ndeshjeje isha ulur vetë në shtëpi duke ngrënë rrush, që është traditë spanjolle në prag të Vitit të Ri”, zbuloi Soldado. “Nuk ishte ndjenja më e mirë, por të nesërmen ia vlejti”.
Në atë ndeshje, Soldado u zëvendësoi me të riun Harry Kane, lojtarin që përshpejtoi largimin e tij te skuadra e Villarrealit pas dy vjetëve zhgënjyes të sulmuesit spanjoll në Premier League.
“Mendërisht nuk isha i përgatitur për një presion aq të madh, sepse ata paguanin shumë para për mua. Nuk dija si ta trajtoja atë. Në kohën kur ndodhi shpërthimi i Kanet, unë isha tashmë në prapavijë”, u shpreh Soldado.
Tani Kane është i lidhur me një largim eventual nga Tottenhami, ndoshta te skuadra e Real Madridit, edhe pse Soldado shpreson që sulmuesi anglez t’i refuzojë të gjitha ofertat dhe të mbetet në ekipin aktual. “Nëse merrni një ofertë nga një klub si Real Madridi, është shumë e vështirë të thuash jo. Unë mendoj se Kane është në prag të një trofeu dhe nëse ndodh, unë me të vërtetë do të doja që ai të ishte kapiten për ta ngritur atë, sepse e di që ai e ndien klubin, ai e do atë nga brenda”, tha Soldado.
Soldado do të dëshironte një tjetër lëvizje në Angli, por pas Villarrealit erdhi Fenerbahçe, dhe më pas oferta nga klube që mund ta kishin paguar më shumë se Granada, por i jepnin më pak minutazhë.
“Ka qenë një udhëtim i gjatë, me shumë ulje dhe ngritje gjatë 17 vjetëve. Unë kam qenë në gjendje të luaj për klube të mëdha që i ëndërrova kur isha fëmijë”, shtoi ai. “Por kur të jesh 35-vjeçar, ditëlindjet vazhdojnë të vijnë dhe ti vlerëson më shumë atë që bën. Unë prapë ngrihem dhe shkoj në stërvitje me gëzim. Dhe kjo është gjithçka”.
Në të vërtetë, të enjten mbrëma zhvillohen edhe tri ndeshje të tjera çerekfinale të Ligës së Evropës, që gjithashtu startojnë në orën 21:00. Në duelet e tjera takohen Ajax – Roma, Arsenal – Slavia dhe Dinamo Zagrebi me Villarrealin.
