Përfaqësueset U18 dhe U20 të Kosovës në hendboll (djemtë) kanë shënuar fitore të premten në kampionatin IHF Trophy për zonën evropiane që po mbahet në Prishtinë.
18-vjeçarët e Kosovës fituan ndeshjen e fortë ndaj Britanisë së Madhe me rezultatin 17:15. Në ndeshjen tjetër të grupmoshës U18, Gjeorgjia fitoi ndaj Shqipërisë me shifrat 38:13.
Gjeorgjia udhëheq me tri fitore, përkatësisht me gjashtë pikë. Bullgaria e Kosova i kanë nga katër pikë. Britania e Madhe i ka dy pikë, ndërsa Shqipëria është pa pikë. Ndeshjet e fundit janë të shtunën. Nga ora 12:00 luajnë Britania e Madhe U18 dhe Bullgaria U18. Ndërsa prej orës 16:00 është ndeshja Kosova U18 – Gjeorgjia U18.
Kampioni siguron kalimin në IHF Trophy ndërkontinentale. Ndërkohë fituesi i fazës ndërkontinentale kualifikohet në Botëror. Kjo vlen për të dy grupmoshat.
Në grupmoshën U20, Kosova të premten fitoi bindshëm ndaj Maltës, 44:28. Ndërkohë Bullgaria e mposhti Andorrën me 46:23. Te 20-vjeçarët, Britania e Madhe është pranë titullit të kampionit. Udhëheq me 6 pikë pas tri ndeshjeve. Bullgaria e Kosova i kanë nga katër pikë, Malta dy dhe Andorra është pa pikë.
Të shtunën Britania e Madhe luan me Andorrën nga ora 14:00 dhe pritet ta sigurojë titullin e kampionit. Prej orës 18:00 luajnë Bullgaria dhe Kosova.
