Trajneri i Skënderbeut, Ilir Daja, e ka cilësuar një hap të madh barazimin 1-1 në fushën e Dinamos së Zagrebit, pavarësisht mënyrës se si rrodhën ngjarjet në ndeshjen e parë të play-offit në Ligën e Evropës.
Pas takimit, trajneri i Skënderbeut, nuk ka ngurruar të paralajmërojë rivalët se në takimin e kthimit në Elbasan, do të kenë përballë një ekip edhe më të fortë, të mbështetur nga një tifozeri e zjarrtë.
“Mund të them se ne morëm çfarë deshëm, ky është një rezultat shumë i mirë për ne. Kemi luajtur një pjesë të parë të madhe, nuk e kam parë ende videon por kam marrë shumë mesazhe që na është anuluar me të padrejtë një nga golat në ndeshje. Nuk i dhamë shumë kohë dhe hapësirë Dinamos dhe u paralizuam nga faullet. Ky është një rezultat i madh për ne, do të shihni një Skënderbe tjetër në ndeshjen e kthimit, në Elbasan presim mbështetje të madhe nga tifozeria jonë”, thotë Daja për faqen zyrtare të klubit, transmeton Koha.net.
Skënderbeu pësoi gol në minutën e fundit të lojës shtesë dhe për këtë Daja thotë se, “ne u tërhoqëm në fund, nuk arritëm të kontrollonim më topin, por nuk mendoj se ishim të lodhur, edhe pse nuk ishim ashtu siç duhej”.
Ai thotë se për kualifikimin gjithçka është ende e hapur.
“Dinamo ka një skuadër të madhe, ne mund ta fitonim, por edhe ky 1-1 është një rezultat i mirë për ne. Kush është i favorizuar? Është ende e hapur, do të jetë një ndeshje interesante dhe nëse kthehemi pas te ajo që bëmë sot, është një hap i madh për ne në Ligën e Europës”, shprehet Daja.