Ish-trajneri i Spanjës, Luis Enrique, po shihet si kandidati potencial për ta marrë drejtimin e Përfaqësueses së Brazilit, ka njoftuar sajti “Sport” të enjten. Enrique tashmë është kontaktuar nga Federata e Futbollit të Brazilit për ta zëvendësuar Titen në postin e trajnerit, i cili u largua pas Kupës së Botës “Katari 2022”.
Brazili u eliminua në çerekfinale të turneut të Katarit, ndërsa federata gjatë kësaj periudhe ka kontaktuar shumë trajner. Jose Mourinho, Pep Guardiola e Carlo Ancelotti kanë refuzuar mundësinë për ta marrë drejtimin e Brazilit, ndërsa thuhet se kontaktet e para me Enriquen ishin pozitive.
Edhe Enrique u largua pas Botërorit të Katarit, pasi u eliminua me Spanjën në 1/8 e finales. Enrique ka qenë për katër vjet në krye të Spanjës, ndërsa në nivel klubesh ka drejtuar Barcelonën, Celta Vigon dhe Romën.