FC Baseli do të luajë kundër Omonia Nicosias të enjten mbrëma në Ligën e Konferencës, por skuadra zvicerane nuk do ta ketë në ekip reprezentuesin e Kosovës, Edon Zhegrovën.
Kështu ka raportuar të mërkurën gjatë ditës mediumi zviceran “Basler Zeitung”, që thotë se Zhegrova nuk ka udhëtuar fare me skuadrën në Qipro.
Në Ligën e Konferencës, 22-vjeçari ka zhvilluar 119 minuta deri tani dhe ka shënuar gol në fitoren 3:1 të Baselit kundër Omonia Nicosias, që u zhvillua në Zvicër.
Zhegrova ka edhe dy gola tjerë të realizuar në elitën e futbollit të Zvicrës, krahas katër asistimeve.
Teorikisht, Baseli e ka të mundur kualifikimin në raundin e 16-të skuadrave më të mira, në rast të fitores.
Baseli ka shtatë pikë dhe është në vendin e parë falë goldallimit më të mirë, pasi po aq pikë ka edhe Qarabagu i Azerbajxhanit.