Boksieri australian George Kambosos Jr. ka bërë befasi të madhe duke e mposhtur të shtunën mbrëma në New York superyllin e boksit Teofimo Lopez, në duelin e vlefshëm për tre tituj të botës në kategorinë e lehtë.
Kambosos Jr ia rrëmbeu Lopezit titujt në versionet WBA, IBF dhe WBO.
Kambosos e rrëzoi Lopezin në raundin e parë, ndërsa në fund ngadhënjeu 2:1 me vlerësim të jurisë. Në raundin e dhjetë Lopez e rrëzoi Kambososin.
Në fund dy anëtarë të jurisë e vlerësuan luftën 115:112, 115:111 në favor të australianit, ndërsa njëri 114:113 në favor të Lopezit.
Për australianin 28-vjeçar kjo ishte fitorja e 20-të në boksin profesionist në po aq meçe, ndërsa 10 prej tyre i ka me nokaut. Lopez në anën tjetër ka pësuar humbjen e parë në boksin profesionist, pas 16 fitoreve rresht.
