Mesfushori i Interit, Kristjan Asllani është gati që ta zëvendësojë Marcelo Brozoviqin në ndeshjen derbi kundër Romës dhe insiston se “nerazzurrët” po mendojnë vetëm për duelin kundër “giallorossëve” e jo për Barcelonën.
Lojtarët e Simone Inzaghit duhet të reagojnë pas disfatës 3:1 kundër Udineses në ndeshjen e fundit që u zhvillua para dy javësh.
Ylli i mesfushës, Brozoviq, ka pësuar dëmtim muskulor me Kroacinë dhe pritet të jetë jashtë fushës për një muaj.
Asllani nënshkroi kontratë në afatin kalimtar të verës kurse u transferua nga Empoli.
Futbollisti i Shqipërisë është parë si zëvendësues i mesfushorit kroat.
Edhe
Calhanoglu lëndohet, vendin e tij e zë Asllani
“Nerazzurrët” nuk kishin zëvendësim të denjë për “Epic Brozon” në edicionin e kaluar dhe nuk arritën që t’i fitonin tri ndeshje të Serie A kur luajtën pa 29-vjeçarin në formacion.
“Unë jam gjithmonë në dispozicion të trajnerit, përfshirë ditën e shtunë”, ka thënë Asllani të enjten për “Tuttosport”.
“Është për të ardhur keq ajo që i ka ndodhur. Ai është lojtar vendimtar për ne, por unë jam i gatshëm kurdo që më vjen momenti. Do të mundohem të jap më të mirën”, ka shtuar Asllani.
“Do të kemi përballë Romën, një ekip i fortë”, ka vazhduar ish-mesfushori i Empolit. “Duhet të luajmë për të fituar. Ne punojmë fort në çdo ditë dhe jam shumë i sigurt që rezultatet do të vijnë”, është shprehur tutje Asllani.
“Nerazzurrët” do të kenë javë vendimtare. Do të luajnë kundër Barcelonës në Ligën e Kampionëve në “Stadio Meazza” të martën, tri ditë pas takimit në Serie A ndaj skuadrës që drejtohet nga Jose Mourinho.
Edhe
Asllani mund të luajë ndaj Veronas
“Ne do të fokusohemi për takimin ndaj Barcelonës në kohën e duhur. Për momentin duhet të mendojmë për Romën. Jemi duke menduar vetëm për ndeshjen e së shtunës kundër ‘giallorossëve’”, përfundoi Asllani.
20-vjeçari iu bashkua skuadrës “ziekaltër” në formë huazimi. Megjithatë, skuadra e Interit është e obliguar që ta blejë atë në verën e ardhshme për 10 milionë euro, plus dy milionë euro të tjera bonuse.
