Drita e ka shënuar një fitore shumë të rëndësishme në udhëtim te Llapi me rezultat 3:1, në derbin e javës së 28-të, i cili u përcoll me akuza të tifozëve vendas se ndeshja ishte e kurdisur.
Në “Zahir Pajaziti” ishin rreth 4 mijë shikues për spektaklin në Podujevë, por kjo u zbeh dhe u prish më pas nga tifozët e Llapit, që hodhën gjësende në fushë, fyen klubin e tyre, hynë në fushe dhe e ndërprenë ndeshjen, raporton KTV.
Krejt kjo, me dyshimin se Llapi do t’ia lëshonte ndeshjen Dritës, që i duhej për ta ruajtur vendin e parë.
Sa i përket ndeshjes ajo ishte e tensionuar që nga fillimi, ku nuk mungon as përjashtimet, jo vetëm të lojtarëve, por edhe të trajnerëve e zyrtarëve të klubeve.
Ishte Llapi që në minutën e 6-të kaloi në epërsi me golin e Mirlind Dakut, gol për të cilin protestuan mysafirët, e ku e pësoi trajneri Bekim Isufi që u përjashtua dhe ndeshjen e shikoi nga tribuna.
Llapi ishte afër golit të dytë në minutën e 23-të me Sinanin, cili qëlloi tërthorësen.
Drita arriti që të barazoi rezultatin në minutën e 36-të me Kastriot Rexhën, rezultat me të cilin u mbyll pjesa e parë.
Në minutën e 52-të, Namani i Llapit pengohet në zonë, por gjyqtari Nuza e vlerëson si ndërhyrje të rregullt.
Rastet e humbura iu kushtuan vendasve, pasi në minutën e 63-të, Drita kaloi në epërsi me golin e Kastriot Rexhës.
Pas këtij goli, tifozët vendas hodhën gjësende në fushë dhe akuzonin skuadrën e tyre se e kanë shitur ndeshjen, madje sharje pati edhe për trajnerin Batatina i cili nuk besonte se çka është duke ndodhur.
Ndeshja u ndërpre për disa minuta dhe më të nisur, ishte përsëri Kastriot Rexha që në minutën e 70-të, shënoi golin e tretë për Dritën, për të kompletuar het-trickun e tij në këtë ndeshje.
Goli i tretë i mysafirëve, “çmendi” edhe më shumë tifozët e Llapit, të cilëve nuk iu mjaftoi vetëm hedhja e gjësendeve dhe sharjet në drejtim të skuadrës së tyre, por ata e ndërprenë ndeshjen duke hyrë në fushën e lojës.
Hyrja e disa tifozëve në fushë e detyroi Genc Nuzën që të dërgoi ekipet në zhveshtore dhe u dha urdhri që të gjithë tifozët e Llapit të largohen nga stadiumi.
Pasi Policia largoi tifozët vendas, ndeshja vazhdoi pas gati 30 minutave dhe krejt çka vlen të përmendet deri në fund, ishin dy kartonët e kuq për Kushtrim Shabanin dhe Ilir Blakçorin e Llapit.
Heroi i fitores së Dritës, Kastriot Rexha, u shpreh i kënaqur me fitoren dhe mohoi se ka pasur kurdisje.
Në anën tjetër, shitje-blerjet i mohuan edhe trajnerët Tahir Batatina dhe Bekim Isufi.
Në javën e 29-të, Drita që mban distancën me Prishtinës në plus tri pikë, është nikoqire e Feronikelit, ndërkaq Llapi që i thotë lamtumirë titullit, i shkon Prishtinës.
-
22 prill 2018 22:14
-
Shpërndaje në: