Ka përfunduar kampi dyditor i Federatës së Futbollit të Kosovës (FFK) në New York të Shteteve të Bashkuara të Amerikës. Në njoftimin e FFK-së, të enjten, thuhet se pjesëmarrës në këtë kamp për grupmoshat U15, U17 dhe U19 morën pjesë 75 futbollistë të rinj. Kampin e mbajtur të martën dhe të mërkurën e udhëhoqën përzgjedhësit e grupmoshave të reja të Kosovës, Ilir Nallbani, Arbnor Morina dhe Adil Maliqi.
“Komuniteti shqiptar në SHBA ka reaguar me mirëseardhje të ngrohtë ndaj këtij organizimi, duke e përgëzuar FFK-në për përkushtimin ndaj zhvillimit të talenteve të futbollit në diasporë. Ky kamp ofroi një platformë unike për lojtarët e rinj shqiptarë në Amerikë, duke iu mundësuar atyre që të prezantojnë aftësitë e tyre të futbollit para përzgjedhësve të ekipeve kombëtare”, shkruan në njoftimin e Federatës së Futbollit të Kosovës.
Kosova mbështetet shumë në lojtarët shqiptarë që janë rritur në shtete të ndryshme. Ndërsa në kampin e SHBA-së thuhet se nuk ka munguar potenciali i lojtarëve të rinj, të cilët do të përcillen dhe bazuar në paraqitjet me klubet e tyre, mund të ftohen për të ardhmen që të jenë pjesë e ekipeve të Kosovës.
“Në këtë kamp, përzgjedhësit vlerësuan potencialin e pjesëmarrësve, duke shprehur bindjen se disa prej tyre do të kenë rritje të ndjeshme në të ardhmen. Ata do të vazhdojnë të përcjellin zhvillimin e tyre në klube dhe varësisht prej performancave të tyre do të vendosin rreth grumbullimit të tyre në ekipet kombëtare”, shkruan FFK.
Federata e Futbollit e Kosovës (FFK) edhe më herët ka organizuar kampe nëpër shtete të ndryshme të Evropës, ndërsa në SHBA planifikon të mbajë kamp edhe në vitet e ardhshme.
“FFK planifikon ta bëjë këtë kamp një traditë vjetore, duke vazhduar të përkrahë zhvillimin e talenteve dhe duke krijuar mundësi të barabarta për lojtarët shqiptarë në SHBA që të integrohen në ekipet e Kombëtares së Kosovës në të ardhmen”, shkruan tutje FFK-ja.
Komuniteti i shqiptarëve në vende të ndryshme të Evropës dhe Shtetet e Bashkuara të Amerikës është goxha i madh.