Pas barazimit me Bullgarinë, Përfaqësuesja U21 e Kosovës në futboll kërkon fitore ndaj Izraelit. Shpresat e Kosovës të premten e shkuar luajtën 2:2 ndaj Bullgarisë, ndërsa të martën përballen me Izraelin. Edhe kjo ndeshje do të luhet në stadiumin “Zahir Pajaziti” në Podujevë dhe nis në orën 13:00.
Dueli Kosovë – Izrael i takon Grupit D të kualifikimeve për “Euro 2025”. Aktualisht Kosova U21 ka një fitore, dy barazime dhe dy humbjeve. Ndaj Izraelit po e kërkon trepikëshin e dytë në këtë cikël kualifikues.
Kosova U21 është e katërta në grup me pesë pikë nga pesë ndeshje. Izraeli është pa pikë nga dy ndeshje të luajtura dhe zë vendin e fundit. Për arsye të sigurisë ndeshja do të luhet pa praninë e shikuesve, ka njoftuar FFK-ja.
Shpresat e Kosovës të hënën kanë mbajtur stërvitjen e fundit para këtij dueli. Stërvitja është zhvilluar në kampin nacional të FFK-së në Hajvali, ndërsa optimizmi nuk ka munguar. Përzgjedhësi Afrim Tovërlani ka thënë se kanë punuar mirë dhe janë munduar t’i përmirësonin gabimet që i kishin ndaj Bullgarisë, sidomos në repartin e mbrojtjes. Tovërlani shtoi se kanë analizuar mirë kundërshtarin dhe se pret paraqitje të mirë të ekipit.
Kundër Bullgarisë, Kosova dy herë ishte në disavantazh, përpara se sulmuesi Ardit Tahiri të siguronte barazimin 2:2.
“Nuk jam adhurues i parashikimit të rezultateve. Dorën në zemër, me Bullgarinë nuk kemi luajtur aq mirë, sidomos reparti i mbrojtjes nuk ka qenë stabil. Gjatë këtyre tri ditëve jemi munduar t’i përmirësonim gabimet dhe do të shohim si do të shkojnë gjërat. Do ta presim ndeshjen dhe të shohim sa kemi mundur të përgatitemi për një kundërshtar si Izraeli”, ka thënë Tovërlani.
Futbollistët Mustafë Abdullahu dhe Redon Ismaili kanë shprehur optimizmin e tyre në prag të ndeshjes me Izraelin. Ata kanë insistuar se i gjithë ekipi është maksimalisht i motivuar dhe se synojnë fitoren.
“Besoj se në këtë ndeshje do ta tregojmë veten dhe do të jemi nivel më i lartë se në ndeshjen e kaluar. E kemi analizuar mirë kundërshtarin, jemi në gjendje të mirë dhe besoj se ekipi do të tregojë rezultat në këtë ndeshje. Edhe pse pa tifozë, ndihemi shumë të fortë pasi luajmë në shtëpi”, tha Abdullahu.
Ndërkohë mesfushori Ismaili insistoi se do të japë gjithçka nga vetja për ta ndihmuar Kosovën.
“Stërvitjet kanë shkuar shumë mirë, jemi shumë të motivuar për ndeshjen e radhës. Grupi është mjaft i mirë, atmosfera shumë e mirë dhe besoj se do të jap gjithçka nga vetja. Edhe djemtë e tjerë janë të motivuar për të dhënë gjithçka nga vetja në këtë ndeshje”, tha Ismaili.
Pas duelit me Izraelin, Kosova U21 i ka edhe katër ndeshje të tjera deri në fund të këtyre kualifikimeve. Katër ndeshjet e fundit do t’i luajë vitin e ardhshëm.
© KOHA. Të gjitha të drejtat janë të rezervuara.
