Trajneri i Real Madridit, Carlo Ancelotti, nuk njihet si person që mbanë inat. Këtë e dëshmoi me kthimin në krye të Real Madridit edhe pse u shkarkua nga presidenti Florentino Perez në vitin 2015. Megjithatë, 64-vjeçari ka diçka për të vërtetuar kur Real Madridi e viziton skuadrën e Napolit në stadiumin “Diego Armando Maradona” në kuadër të Ligës së Kampionëve.
Ancelotti ishte shkarkuar nga Napoli në dhjetor të vitit 2019, gjysmë ore pasi kishte udhëhequr skuadrën përtej fazës së grupeve të Championsit. Ancelotti për shkarkimin ishte njoftuar në hotelin ku tani është vendosur me skuadrën e Real Madridit.
Napoli dhe Real Madridi do të përballen të martën prej orës 21:00 në kuadër të xhiros së dytë të Grupit C të Championsit.
Shkarkimi i Ancelottit pati ardhur për shkak të rezultateve të dobëta në Serie A dhe tensioneve të krijuara në zhveshtore. Periudha e tij në krye të Napolit zgjati vetëm një vit e gjysmë. Ai u pat zëvendësuar me Gennaro Gattuson.
Në konferencën për shtyp, të hënën mbrëma, Ancelotti nuk ka dashur të flasë për kohën e kaluar te Napoli. Ai ka insistuar se Reali do të dalë në fushë për ta vazhduar serinë e fitoreve në Champions.
“Do të përballemi me njërin prej ekipeve më të mirë në Itali. Do të jetë ndeshje e fortë dhe e barabartë. E kemi parasysh nivelin e lartë të Napolit dhe cilësinë individuale që posedon, por ne kemi ardhur për një synim. Ne duhet të përsëritim paraqitjen e mirë ndaj Gironas dhe të shënojmë fitoren e radhës”, është shprehur Ancelotti. “Kam dyshime sa i përket formacionit, të cilin do ta vendos pak para ndeshjes. Do të zgjedh më të mirët dhe nëse arrijmë që në këtë ndeshje mos të pranojmë gol, atëherë gjasat i kemi të mira për të fituar”.
Napoli ndaj Real Madridit futet pas fitores së thellë 4:0 në kampionat ndaj Lecces. Trajneri i Napolit, Rudi Garcia ka vlerësuar lartë Realin dhe ka paralajmëruar ekipin e tij nga rreziku që i kanoset nga Jude Bellingham. Mesfushori anglez po shkëlqen në edicionin e tij të parë te Reali, ku në tetë ndeshje të luajtura deri më tani ka shënuar shtatë gola dhe ka bërë dy asistime. Garcia ka shtuar se edhe lojtarët tjerë të Realit janë të rrezikshëm për Napolin dhe për këtë arsye pret që ekipi i tij të japë 100 për qind nga vetja në këtë përballje.
Edhe Napoli, sikurse Reali, ka fituar ndeshjen e parë në grup. Triumfoi 2:1 në udhëtim te Braga, ndërsa Reali mposhti 1:0 Union Berlinin.
Napolit edhe në këtë ndeshje do t’i mungojë mbrojtësi i Kosovës, Amir Rrahmani që ende nuk është rikuperuar nga lëndimi që e pësoi me Bragan. Ndërkohë, Realit i mungon David Alaba.
“Liga e Kampionëve është gara më e mirë, është moment special për lojtarët dhe trajnerin. Vetëm himni i Championsit mjafton për të motivuar, ndërsa besoj se motivimi nuk do t’i mungojë Napolit duke pasur parasysh se përballë ka Real Madridin. Kështu që do të japim gjithçka nga vetja për një rezultat të favorshëm, edhe pse nuk do të jetë lehtë. Ne e njohim Realin dhe e kemi parasysh se çfarë na pret”, është shprehur Garcia. “Bellingham e ka zëvendësuar Karim Benzeman edhe pse nuk luan në pozitën e tij, ndërsa edhe lojtarët e tjerë janë të rrezikshëm. Duhet të jemi të fokusuar dhe të japim maksimumin për të treguar forcën tonë në të gjitha repartet. Është ndeshje e rëndësishme dhe sigurisht se duam të fitojmë”.
Dueli tjetër i këtij grupi është ai që luhet në Gjermani, ndërmjet Union Berlinit dhe Bragas, ndërsa nis në orën 18:45.
Fillim të dobët këtë edicion në Champions pati nënkampioni në fuqi i Evropës, Interi. Në duelin e parë, ekipi italian luajti 1:1 ndaj Real Sociedadit dhe atë falë golit të sulmuesit Lautaro Martinez në fund të takimit. Në xhiron e dytë të Grupit D, Interi e pret Benfican, ekip që humbi 2:0 në duelin e parë. U mposht në shtëpi nga skuadra e Salzburgut të Austrisë.
“Do të jetë ndeshje sfiduese për shkak se dyja ekipet kërkojnë fitoren e parë në Champions. Do të jetë një duel i vështirë, të cilin në fund shpresoj ta fitojmë ne pasi kemi nevojë për këtë fitore në Champions para pushimit ndërkombëtar”, tha trajneri i Interit, Simone Inzaghi.
Ndeshjet e të martës mbrëma:
Grupi A
Copenhagen– Bayern M. (21:00)
Man. Utd – Galatasaray (21:00)
Grupi B
Lens – Arsenal (21:00)
PSV Eindhoven – Sevilla (21:00)
Grupi C
U. Berlin – Braga (18:45)
Napoli – Real Madrid (21:00)
Grupi D
Salzburg – R. Sociedad (18:45)
Inter – Benfica (21:00)
© KOHA. Të gjitha të drejtat janë të rezervuara.
