Sulmuesi i Sllovenisë, Benjamin Sheshko, është lodhur nga krahasimet që po i bëhen me Erling Haalandin. Këto krahasime janë disi të pashmangshme. Të dy lojtarët janë sulmues të gjatë 194 centimetra, që hodhën hapa formues në karrierën e tyre te skuadra austriake Salzburg, përpara se të transferoheshin në klubet gjermane. Sheshko kaloi te klubi simotër i Salzburgut, Leipzigu, këtë verë, ndërsa Haalandi u transferua te Borussia Dortmundi në vitin 2020 përpara se t'i bashkohej Manchester Cityt verën e kaluar.
“Unë tashmë thashë se nuk jam Haalandi, por jam vetja”, insistoi 20-vjeçari Sheshko të hënën. “E vetmja gjë që kemi të ngjashme është gjatësia. Gjithashtu ne të dy jemi të shpejtë, por në përgjithësi kemi një stil të ndryshëm të lojës”.
Sheshko shënoi golat e parë në Bundesligë kur realizoi dy herë në fitoren 3:0 të Leipzigut në udhëtim tek Union Berlini më 3 shtator, duke i dhënë fund serisë së Unionit prej 24 ndeshjeve pa humbje në shtëpi. Ai gjithashtu vulosi fillimin fitues të Leipzigut në Ligën e Kampionëve duke shënuar gol vendimtar ndaj Young Boysit. Manchester City është kundërshtari i radhës i Leipzigut në Champions, kurse kthimi i Haalandit në Gjermani do të ofrojë më shumë mundësi për krahasime.
“Ky krahasim është me dikë që është një nga lojtarët më të mirë në botë. Kështu që nuk është e lehtë të krahasohesh”, tha Sheshko. “Nuk do të doja ta krahasoja veten me askënd. Do të më pëlqente të isha vetvetja dhe të isha më i miri në përgjithësi”.
Sheshko është duke bërë një punë të mirë deri tani. Ai ka shtatë gola në 22 paraqitje për Slloveninë. Asistoi dy herë dhe shënoi një gol në fitoren 4:2 ndaj Irlandës së Veriut në kualifikimet për “Euro 2024” më 7 shtator. Edicionin e shkuar Sheshko shënoi 16 gola në ligën austriake. Si lojtar i ri, Sheshko u frymëzua nga Zlatan Ibrahimoviqi, një tjetër sulmues i jashtëzakonshëm që pati karrierë të jashtëzakonshme në disa prej klubeve më të mëdha të Evropës, duke përfshirë Ajaxin, Juventusin, Interin, Milanin, Barcelonën dhe Paris Saint-Germainin.
“Thjesht më pëlqente ta shikoja atë. Ai po kënaqej vetë në fushë. Ai po bënte atë që donte të bënte”, tha Sheshko.
Sulmuesi i ri kishte mundësinë të bashkohej me Manchester Unitedin, që ishte në mesin e klubeve nga Premier League që kishin shprehur interesim për të. Por Sheshko zgjodhi Leipzigun.
“Mendoj se ishte më mirë për mua të vija këtu,” tha Sheshko për transferimin që raportohet se i kushtoi Leipzigut 24 milionë euro. Ai kaloi një edicion tjetër në skuadrën austriake pasi transferimi u dakordua vitin e kaluar, përpara se të realizohej këtë verë. Leipzigu ka katër fitore nga pesë ndeshjet e Bundesligës deri më tani dhe në duelin e ardhshëm përballet me Bayernin të shtunën.
Skuadra tashmë e mposhti Bayernin 3:0 në Superkupën e Gjermanisë, por bavarezët janë të pamposhtur në kampionat dhe po synojnë titullin e 12-të rresht.
Sheshko beson se Leipzigu, i cili fitoi dy trofetë e fundit të Kupës së Gjermanisë, mund të sfidojë dominimin e Bayernit në ligë.
“Gjithçka varet prej nesh. Duhet të tregojmë se mund t'i fitojmë ndeshjet. Ne kemi një ekip vërtet të mirë, mendoj se kemi një shans të madh këtë vit”, insistoi ai.
Larg fushës së futbollit, Sheshko është një tifoz i madh i basketbollit, sport që e luan për argëtim.
“Pas futbollit unë gjithmonë kam luajtur basketboll dhe vazhdoj ende të luaj, sepse e dua këtë sport. Është gjëja më e mirë të shënosh pikë në basketboll dhe këtë e bëj në kohën e lirë”, tha Sheshko.
© KOHA. Të gjitha të drejtat janë të rezervuara.
