Mbrojtësi Kastriot Dermaku do t’i mungojë skuadrës së Lecces edhe në ndeshjen e radhës, atë kundër Juventusit.
Dermaku ende nuk është rikuperuar nga lëndimi që e pësoi para fillimit të këtij edicioni dhe nuk është ftuar fare nga trajneri Robert D’Aversa për duelin me Juventusin.
Kjo ndeshje, luhet të martën prej orës 20:45 dhe i takon xhiros së gjashtë në Serie A. Në fakt, Dermaku këtë edicion nuk e ka regjistruar ende asnjë paraqitje për Leccen.
Megjithatë, për dallim prej Dermakut, te Lecce për duelin me Juventusin janë ftuar Ylber Ramadani e Medon Berisha. Ramadani pritet të jetë titullar te Lecce në këtë ndeshje, ndërsa Berisha në stol.
Lecce këtë edicion ka pasur një start të furishëm, ku prej pesë ndeshjeve të zhvilluara në Serie A, ka regjistruar tri fitore dhe dy barazime.
Renditet në pozitën e tretë në tabelë me 11 pikë, një më shumë se Juventusi që është i katërti. Ramadani, i cili iu bashkua Lecces këtë verë, ka luajtur në të gjitha ndeshjet e Serie A deri më tani, ndërsa Berisha është në pritje të debutimit.
© KOHA. Të gjitha të drejtat janë të rezervuara.
