Është një tjetër trofe për t’u fituar në Evropë këtë javë dhe futbollistët e Manchester Cityt dhe Interit do të jenë të gatshëm për të luajtur në turneun final të Ligës së Kombeve, që mbahet në Holandë.
Mbrojtësit e Holandës, Nathan Ake dhe Denzel Dumfries janë sërish bashkëlojtarë pasi u përballën në finalen e Championsit, që u zhvillua të shtunën e kaluar në Stamboll. Ake ishte pjesë e Cityt, ekip që e mposhti Interin e Dumfriesit me rezultatin 1:0 për trofeun e parë evropian në histori. Holanda, e cila është mikpritëse e turneut final të Ligës së Kombeve, do të luajë në gjysmëfinalen e parë të mërkurën në Roterdam kundër Kroacisë. Pjesë e Kroacisë do të jetë mesfushori i Interit, Marcelo Brozoviq.
Spanja do të mbështetet në mesfushorin Rodri – që shënoi golin e vetëm në finalen e Championsit – për gjysmëfinalen e dytë kundër Italisë, të enjten në Enshede.
Finalja e Ligës së Kombeve do të luhet të dielën në Roterdam, ndërsa dueli për vendin e tretë do të zhvillohet të njëjtën ditë në Enschede. Trajneri i Italisë, Roberto Mancini, ka ftuar pesë lojtarë të Interit, përfshirë komplet repartin e mbrojtjes – Francesco Acerbi, Alessandro Bastoni, Matteo Darmian – që e mbajti të qetë Erling Haalandin e Cityt në finalen e Ligës së Kampionëve.
Edicioni i gjatë evropian u nda në dy pjesë nga Kupa e Botës në Katar. Kroacia përfundoi e treta në Botëror, katër vjet pasi arriti në finale dhe humbi nga Franca.
“Në fund të edicionit ekziston çështja e lodhjes”, tha trajneri i Kroacisë, Zlatko Daliq. “Por ne kemi një mundësi historike për të fituar trofeun e parë”.
Pikërisht synimi për trofeun e parë ndërkombëtar duket se e bindi Luka Modriqin të qëndronte me Kroacinë. Tani 37-vjeç, Modriq ka luajtur 164 herë për vendin e tij dhe mbetet të shihet nëse pas Ligës së Kombeve do të vazhdojë të jetë pjesë e Kroacisë. Është turneu i tretë final i Ligës së Kombeve, në të cilin përfaqësueset arrijnë duke fituar një grup të Ligës A. Shpërblimi prej 10.5 milionë eurosh nga UEFA e rrit interesimin e përfaqësueses për sukses.
Holanda
Holandezët janë pa dy lojtarë kyç, ndërsa përpiqen të fitojnë titullin e parë ndërkombëtar që nga Kampionati Evropian i vitit 1988. Shkaku i lëndimit, sulmuesi Memphis Depay nuk do të jetë në gjendje ta ndihmojë Holandën. Ai është lojtari më i rëndësishëm i Holandës, pasi ka shënuar mesatarisht një gol çdo dy ndeshje dhe deri më tani ka 88 paraqitje ndërkombëtare. Po ashtu lëndim pësoi edhe Matthijs de Ligt, që zëvendësohet nga Daley Blind.
Holanda ishte nënkampione e edicionit inaugurues të Ligës së Kombeve. Kishte humbur nga Portugalia në finalen e vitit 2019, pasi kishte mundur Anglinë në gjysmëfinale.
Kroacia
Liga e Kombeve u jep Modriqit dhe shokëve të tij të skuadrës një tjetër rast, nëse jo të fundit, për të fituar trofe. 34-vjeçari Ivan Perishiq dhe 30-vjeçari Marcelo Brozoviq ende shfaqen në një mesfushë vazhdimisht të mbushur me yje.
Kroacia u kualifikua nga një grup i vështirë i Ligës së Kombeve që përfshinte finalisten e Kupës së Botës, Francën, dhe Danimarkën. Goli i Modriqit nga penalltia në “Stade de France”, qershorin e kaluar, ia siguroi Kroacisë fitoren e parë ndaj Francës në tentimin e 10-të. Mbrojtësi i Leipzigut, Joshko Gvardiol, nuk është i gatshëm për lojë shkaku i lëndimit, ndërsa Kroacisë së fundi i është shtuar sulmuesi i Augsburgut, Dion Drena Beljo.
Italia
Lojtarët e Interit mund të largojnë shpejt zhgënjimin e tyre në Champions, si shtylla kryesore e kampiones së Evropës, Italisë. Nicolo Barella dhe Federico Dimarco u bashkuan të hënën me ekipin. Kjo do të jetë ndeshja e tretë gjysmëfinale e Italisë kundër Spanjës në dy vjet. Italia fitoi me penallti pas barazimit 1:1 në gjysmëfinalen e “Euro 2020” në Londër. Spanja më pas fitoi 2:1 në Milano në gjysmëfinalen e turneut final të Ligës së Kombeve në vitin 2021.
Spanja
Trajneri i Spanjës, Luis de la Fuente, do të vihet në provë pas një fillimi të dobët. Ai zëvendësoi Luis Enriquen pas Kupës së Botës, por edhe nën drejtimin e tij spanjollët po kanë pak raste për shënim.
Në mars, Spanjës iu deshën dy gola të vonshëm në një fitore të vështirë 3:0 ndaj Norvegjisë, që ishte pa Erling Haalandin. Me atë fitore hapi kampanjën kualifikuese për “Euro 2024”, përpara se të mposhtej nga Skocia (2:0). Kjo e ka lënë trajnerin nën presion për të treguar përmirësim të dukshëm në turneun final të Ligës së Kombeve, në të cilin Spanja arriti në finale në vitin 2021, por u mposht nga Franca.
Spanja ka probleme me lëndimet e lojtarëve, si Nico Williams, David Garcia dhe Juan Bernat, që nuk kanë udhëtuar në Holandë. Janë zëvendësuar nga Ansu Fati, Nacho Fernandez dhe Fran Garcia.
© KOHA. Të gjitha të drejtat janë të rezervuara.
