Një rekord i futbollit evropian do të bjerë të mërkurën mbrëma kur Sevilla përballet me Romën e Jose Mourinhos në finalen e Ligës së Evropës. Finalja nis në orën 21:00 dhe zhvillohet në stadiumin “Pushkash Arena” në Budapest të Hungarisë.
Sevilla e Mourinho nuk e kanë humbur asnjë finale evropiane deri më tani, duke e bërë finalen e këtij edicioni njërën prej më interesanteve në historinë e Ligës së Evropës. Sevilla ka luajtur në gjashtë finale dhe i ka fituar të gjitha, në kuadër të Ligës së Evropës apo Kupës UEFA-s, siç është quajtur më parë niveli i dytë i garave evropiane për klube.
Trofeu i parë për Sevillan, që është ekipi më i suksesshëm i kësaj gare, ka ardhur në vitin 2006. Tani Sevilla po synon të vendos rekord të ri me triumfin ndaj Romës në finalen e Budapestit. Por Mourinho ka bilanc 5:0 në finalet e kupave evropiane në nivel klubesh në karrierën si trajner, ndërsa trofeun e parë e ka fituar në vitin 2003. Portugezi Mourinho vitin e shkuar u bë trajneri i parë që ka fituar trofe në të gjitha garat e UEFA-s. Suksesi i Mourinhos deri më tani përfshinë dy trofe të Ligës së Kampionëve (Porto, Inter), dy trofe të Ligës së Evropës (Porto, Manchester United) dhe trofeun e Ligës së Konferencës që e fitoi edicionin e shkuar me Romën.
Krahas rekordit që po e synojnë si Mourinho ashtu edhe Sevilla, triumfi në finalen e Ligës së Evropës do të jetë shpërblim si për ekipin nga La Liga ashtu edhe për atë nga Serie A. Roma dhe Sevilla nuk mund ta përfundojnë edicionin në ligat e tyre në vendin e katërt i cili garanton pjesëmarrjen në Ligën e Kampionëve në edicionin e ri. Kështu që rruga e vetme e tyre për të luajtur në Champions është që ta fitojnë Ligën e Evropës.
“Nuk më intereson të bëhem trajneri i parë që e kam fituar këtë garë me tri ekipe të ndryshme. Unë thjesht dua që këtë sukses ta shijojnë tifozët e Romës, pasi në këtë moment të karrierës time mendoj vetëm për lumturinë që mund t’ua jap atyre. Më kanë pritur shumë mirë dhe këtë dua t’ua shpërblejë me trofe”, është shprehur Mourinho të martën. “Askush nuk ka pritur që Roma të jetë në finale, duke pasur parasysh se kishte shumë ekipe të forta. Por, ne kemi luajtur mirë dhe kemi bërë një rrugë të gjatë për të arritur deri këtu. Tani duhet të japim gjithçka nga vetja që ky rrugëtim të na shpërblehet me trofe”.
Roma nuk do të ketë aspak punë të lehtë përballë Sevillas, ekip që është ringjallur me ardhjen e trajnerit Jose Luis Mendilibar. Për pjesën më të madhe të edicionit në La Liga, Sevilla luftoi për t’i ikur zonës së rënies dhe shkarkoi dy trajnerë përpara se Mendilibar ta merrte drejtimin e ekipit dhe të arrinte në finalen e Ligës së Evropës. Rrugës deri në finale Sevilla e mposhti PSV Eindhovenin, Fenerbahçen, Manchester Unitedin dhe Juventusin dhe që nga ardhja e trajnerit Mendilibar, në muajin mars, ka regjistruar vetëm dy humbje në të gjitha garat.
Roma nuk di për fitore në shtatë ndeshjet e fundit kampionale dhe ka gjasa të jetë pa sulmuesin Paulo Dybala për ndeshjen finale ndaj Sevillas. Argjentinasi ende nuk është rikuperuar plotësisht nga lëndimi.
“Ne e kemi merituar plotësisht të arrijmë në këtë finale, ndonëse shumë njerëz nuk e kanë pritur një gjë të tillë. Do të jetë finale e vështirë. Është vetëm një ndeshje dhe vetëm njëri ekip do ta fitojë trofeun. Nuk do të dorëzohemi deri në fund të ndeshjes”, është shprehur Mendilibar. “Edhe historia është në anën tonë, por ne mund ta shijojmë suksesin vetëm nëse luajmë siç kemi luajtur deri më tani për të arritur në këtë finale”.
Sevilla vlerësohet favorite përballë Romës duke pasur parasysh suksesin në këtë garë. Pas triumfeve në vitet 2006, 2007, 2014, 2015, 2016 dhe 2020, Sevilla po synon edhe një sukses në garën e saj të preferuar. Ndaj Romës, ekipi spanjoll do të jetë pa mbrojtësin e krahut të majtë, Marcos Acuna, i cili u ndëshkua me karton të kuq në ndeshjen e dytë gjysmëfinale kundër Juventusit.
Skuadra e Romës nuk ka triumfuar asnjëherë në Ligën Evropiane. Ishte nënkampione në vitin 1991.
© KOHA. Të gjitha të drejtat janë të rezervuara.
