Përballja mes Sevillas dhe Romës mund të duket një ndeshje e barabartë në letër. Dy skuadrat takohen në finalen e Ligës së Evropës. Por suksesi i spanjollëve në këtë garë mund t'u japë atyre një avantazh në Budapest.
Sevilla është ekipi që ka më së shumti trofe të fituar në këtë garë, gjashtë, me konkurrentët më të afërt, Interin, Liverpoolin, Juventusin dhe Atletico Madridin, me nga tre tituj.
Pavarësisht edicionit zhgënjyes në La Liga, Sevilla ka rritur shpejtësinë në Ligën e Evropës, duke e eliminuar Manchester Unitedin dhe më pas Juventusin për të arritur në finalen e shtatë. Në gjashtë finalet e mëparshme, Sevilla ka dalë fituese dhe kapiteni Jesus Navas është i bindur se do ta ngrit trofeun e shtatë. Navas ka insistuar se Liga e Evropës është garë e ndërtuar për Sevillan.
“Ne transformohemi në Ligën e Evropës dhe është e pabesueshme se si dalim në çdo ndeshje të motivuar për ta fituar”, tha Navas. “Është një garë që na ka dhënë shumë dhe në gëzohemi sa herë që marrim pjesë, pasi na motivon që të shkojmë sa më larg”.
Këtë edicion një objektiv shtesë është kthimi i tifozëve për mbështetjen e ekipit, pas një prej kampanjave më të këqija të Sevillas në La Liga.
Që kur u promovua në elitën e futbollit spanjoll në vitin 2001, Sevilla nuk ka përfunduar kurrë në pjesën e poshtme të tabelës. Aktualisht është në vendin e 11-të me një xhiro të mbetur deri në fund. Mund të ishte shumë më keq. Sevilla flirtoi me rënien nga elita për pjesën më të madhe të kësaj kampanje, duke shkarkuar fillimisht Julen Lopeteguin dhe më pas Jorge Sampaolin, përpara se Jose Luis Mendilibar të emërohej trajner i ekipit.
“Ne jemi një familje, e kemi treguar këtë. Kemi pasur disa momente shumë të këqija, por çereku i fundit i edicionit ka qenë spektakolar”, tha sulmuesi Rafa Mir. “Tani kemi finalen dhe duam të kthehemi në shtëpi me trofeub të cilin e kemi fituar më së shumti vitet e fundit”.
Sevilla e fitoi këtë garë për herë të parë në vitin 2006, me Navasin, tani 37 vjeç, i përfshirë si 20-vjeçar. Sevilla kishte mposhtur ekipin e Steve McLarenit, Middlesborough, 4:0 në finale. Ishte suksesi i parë evropian dhe trofeu i parë i Sevillas për 57 vjet. I ndjeri Antonio Puerta shënoi në kohën shtesë për të ndihmuar skuadrën e Juande Ramos ta eliminonte Schalken në gjysmëfinale, një gol që mbahet mend me dashuri edhe sot e kësaj dite në qytetin andaluzian.
Puerta shënoi nga penalltia vitin tjetër në finale, ndërsa Sevilla mposhti rivalin e La Ligës, Espanyolin në Glasgow, për të ngritur kupën edhe një herë. Vetëm disa muaj më vonë Puerta vdiq pasi pësoi atak në zemër teksa luante për klubin e tij në La Liga. Sevillas iu deshën sërish penalltitë për të triumfuar në vitin 2014 me Unai Emeryn në krye. Mposhti Benfican për të fituar garën për herë të tretë, me kroatin Ivan Rakitiq që luajti rol kyç përpara transferimit te Barcelona.
Sevilla vazhdoi të fitojë dy edicionet e ardhshme të Ligës së Evropës, duke mposhtur fillimisht Dnipro Dnipropetrovsk 3:2 në një ndeshje emocionuese në vitin 2015, me sulmuesin kolumbian Carlos Bacca që shënoi dy herë. Edicionin pasues, Sevilla mundi Liverpoolin e Juergen Kloppit, 3:1, duke ia mohuar trajnerit gjerman trofeun e parë në krye të ekipit nga Premier League.
“Ne kemi një histori dashurie me Ligën e Evropës e kjo do të konfirmohet edhe në finalen e këtij edicioni. Jemi gati dhe po mendojmë për trofeun”, insistoi kapiteni Navas.
Sevilla arriti trofeun e gjashtë dhe atë nën drejtimin e Lopeteguit, kundër Interit në një tjetër fitore emocionuese 3:2, megjithëse në një stadium bosh për shkak të pandemisë Covid-19. Autogoli i Romelu Lukakut e vendosi lojën dhe siguroi që Sevilla të ruante bilancin e saj të qind për qindtë në finalet e Ligës së Evropës.
Në krye të Romës është portugezi Jose Mourinho. Mourinho është një nga trajnerët më të sigurt dhe më të trofeshëm në futbollin botëror, por edhe ai mund të trembet nga dominimi i Sevillas në Ligën e Evropës.
Finalja e Ligës së Evropës do të zhvillohet të mërkurën prej orës 21:00 në stadiumin “Puskas Arena” në Budapest të Hungarisë. Përderisa Sevilla po e kërkon trofeun e shtatë të Ligës së Evropës, Mourinho po synon trofeun e dytë evropian me ekipin italian, pasi edicionin e shkuar triumfoi në Ligën e Konferencës.
© KOHA. Të gjitha të drejtat janë të rezervuara.
