Hendbollistët e Besa Famgas kanë konfirmuar edhe një herë dominimin në Superligën e Kosovës në hendboll.
Të enjten mbrëma, Besa është shpallur kampione e këtij edicioni, pasi edhe në ndeshjen e dytë të serisë finale të plejofit e mposhti Trepçën. Madje, në përballjen e dytë, skuadra pejane ishte bindshëm më e mirë se në ndeshjen e parë, të cilën e fitoi javën e shkuar në Pejë me vetëm tre gola epërsi. Në palestrën “Minatori” në Mitrovicë, Besa triumfoi me rezultatin bindës 37:30. Për Besën, ky është titulli i dhjetë rresht, duke konfirmuar dominimin e saj total në hendbollin kosovar përgjatë dekadës së fundit.
Në anën tjetër, Trepça e mbyll këtë edicion me triumf në Kupën e Kosovës. Këtë trofe e fitoi pas 21 vjetësh. Në fakt, javë më parë, Trepça e mposhti pikërisht Besa Famgasin në finalen e Kupës së Kosovës. E për Trepçën, ky edicion mund të vlerësohet tejet i suksesshëm, duke pasur parasysh se doli edhe nënkampione, duke pasur parasysh se klubi ka bërë një riorganizim të madh së fundmi. Herën e fundit, Trepça doli kampione e Kosovës në vitin 2001. Ndeshja e dytë finale u përshkrua me atmosferë të mirë në tribuna dhe lojë të shpejtë dhe tejet të mirë nga skuadra mysafire që prej fillimit, dukej e vendosur për t’i dhënë fund kësaj serie finale pas dy dueleve të luajtura. Skuadra e Trepçës u tregua kundërshtare e denjë dhe e barabartë vetëm në minutat e para të ndeshjes.
Në fakt, deri në minutën e nëntë, Besa ishte në disavantazh prej një goli. Megjithatë, prej minutës së nëntë kur për herë të parë kaloi në epërsi (4:3), Besa nuk e ka lëshuar atë, duke e bërë Trepçën që të ishte vazhdimisht në ndjekje të rezultatit. Deri në fund të pjesës së parë, Besa e thelloi epërsinë në shtatë gola për të shkuar në pushim me shifrat 17:10. Ndërkohë, pas vetëm dhjetë minutave lojë në pjesën e dytë, Besa veçse i dha fund dilemës së fituesit.
Në minutën e 40-të, Besa shtoi epërsinë në 10 gola (24:14), e cila me kalimin e kohës shkoi edhe deri në 13 sosh (30:17). Edhe pse në minutat e fundit të ndeshjes, trajneri i Besës ua dha rastin lojtarëve të rinj për të krijuar përvojë, duke bërë që Trepça deri në fund të takimit ta ngushtojë epërsinë e thellë në vetëm shtatë gola.
Më i dalluari në këtë fitore të Besës ishte Arbios Mushkolaj. Ai ndeshjen e mbylli me tetë gola të shënuar, ndërsa me lojë të mirë te Besa u veçuan edhe Egzon Gjuka që pati 7 gola, pastaj Nikola Prce me gjashtë dhe Denis Shabanoviq me pesë sosh.
Ndërkohë, te skuadra e Trepçës më efikasit ishin Deniz Terziqi me tetë gola dhe Shpëtim Mehmeti me shtatë gola të realizuar. Muhamet Dubovci e Yassine Henahen shtuan nga katër secili, ndërsa kapiteni Sali Maxhera e përfundoi ndeshjen me tre gola të realizuar. Trofeun e kampionit e pranoi kapiteni i Besës, Egzon Gjuka, të cilin ia dorëzuan kryetari i Federatës së Hendbollit të Kosovës (FHK), Eugen Saraçini, dhe zëvendësministrja e Kulturës, Rinisë dhe Sportit, Daulina Osmani. Me këtë ndeshje u mbyll edhe edicioni 2022/23 i hendbollit kosovar në nivelin senior. Një ditë para se Besa ta shpallet kampione, skuadra e Istogut mbrojti titullin e fituar edicionin e shkuar në Superligën e Femrave.
© KOHA. Të gjitha të drejtat janë të rezervuara.
