Real Madridi dhe Barcelona janë futur në garë për shërbimet e sulmuesit të krahut, Federico Chiesa. E përditshmja spanjolle “Marca” shkruan të martën, se dy klubet nga La Liga po synojnë transferimin e italianit në fund të sezonit.
Chiesa është pjesë e Juventusit, ndërsa tek ekipi italian po e mendojnë shitjen e tij për shkak të telasheve me lëndimet që i ka pasur vitin e shkuar.
Si Reali ashtu edhe Barcelona duhet të ofrojnë të paktën 60 milionë euro për ta siguruar Chiesan, i cili ka kontratë me Juventusin deri në vitin 2025. 25-vjeçari është pjesë e Juventusit prej vitit 2020, kur iu bashkua nga Fiorentina, ndërsa këtë sezon ka 2 gola e 4 asistime në 14 paraqitje në të gjitha garat.
