Planet e Federatës së Futbollit të Belgjikës për të emëruar Domenico Tedescon si përzgjedhës të përfaqësueses belge vazhdojnë të pengohen nga negociatat për kontratën me ish-klubin e tij, RB Leipzig.
Por burime brenda federatës belge thanë se drejtuesit e saj presin që çështja të zgjidhet brenda javës.
37-vjeçari ra dakord që të zëvendësojë Roberto Martinezin në krye të Belgjikës dhe të firmosë kontratë të vlefshme deri në Kupën e Botës 2026. Por Tedesco nuk ka qenë në gjendje të nënshkruajë ndërsa negocionte kontratën e tij me klubin e Bundesligës gjermane, Leipzigun.
Tedesco u pushua nga puna në muajin shtator, por ende ka të drejtë për një milion euro në paga, thanë burimet brenda ekipit gjerman. Ai gjithashtu do të fitojë një pagesë shtesë nëse klubi fiton titullin e kampionit në Bundesligë dhe është duke negociuar një zgjidhje për të parë se sa mund të marr nga paratë e garantuara në bazë të kontratës.
Leipzigu aktualisht zë vendin e katërt në kampionatin e Gjermanisë, me katër pikë më pak se Bayern Munichu që është lider pas 19 xhirove të zhvilluara. Federata belge ka shpresuar të lëshoi një njoftim formal për angazhimin e trajnerit të ri në fund të kësaj jave, por shkaku i këtyre çështjeve detyrohet të presë ende. Tedesco i ka njoftuar drejtuesit e federatës se është në negociata të vazhdueshme me drejtuesit e Leipzigut dhe nuk dihet se kur mund të arrihet marrëveshja mes palëve.
Trajneri i ri ishte në krye të Leipzigut prej dhjetorit të vitit 2021 deri në shtatorin e vitit të shkuar, ndërsa ka punuar edhe te Spartaku i Moskës, Schalke e Erzgebirge Aue. Si Tedesco, ashtu edhe federata belge po shpresojnë se selektori në ardhje do të ketë kohë të mjaftueshme për ta përgatitur ekipin për ndeshjet e para të kualifikimeve për “Euro 2024” që zhvillohen në fund të muajit të ardhshëm. Ndeshjen e parë kualifikuese Belgjika e luan në Stokholm më 24 mars kundër Përfaqësueses së Suedisë. Katër ditë pas këtij dueli, Belgjika ka të aranzhuar një miqësore me Gjermaninë, ndeshje kjo që do të luhet në qytetin e Koelnit.
Spanjolli Martinez u largua nga Belgjika pas Kupës së Botës “Katari 2022”, në të cilin u eliminua në fazën e grupeve. Ai ishte selektor i Belgjikës prej vitit 2016, ndërsa javë më parë e mori drejtimin e Përfaqësueses së Portugalisë.
Tedesco është i lindur në Itali, ndërsa është rritur në Gjermani. Me skuadrën e Leipzigut, Tedesco e ka fituar Kupën e Gjermanisë në edicionin 2021/22.
© KOHA. Të gjitha të drejtat janë të rezervuara.
