Mesfushori Naby Keita ka vendosur të largohet nga Liverpooli në fund të këtij sezoni kur edhe i skadon kontrata, përcjellë “Sky Sports” të hënën.
Bëhet e ditur se Keita nuk është i interesuar ta vazhdojë karrierën tek ekipi anglez dhe pritet të rikthehet në Gjermani. Po ashtu, 27-vjeçari nuk ka pasur as hapësirë të madhe tek Liverpooli këtë sezon, pasi shkaku i lëndimeve është limituar në vetëm 11 paraqitje në të gjitha garat.
Keita iu bashkua Liverpoolit në vitin 2018 nga Leipzigu për 65 milionë euro, ndërsa karrierë në Evropë ka bërë edhe te Salzburgu e Istresi. Ai po monitorohet edhe nga Interi, por thuhet se gjasat janë të mëdha që Keita të kthehet në kampionatin gjerman.
