Pasi i dështoi huazimi te Paris Saint-Germaini, Hakim Ziyech pritet që karrierën ta vazhdojë në Turqi. “Daily Mail” shkruan të enjten se marokeni pritet të huazohet te skuadra e Beshiktashit pasi afati kalimtar i dimrit në Turqi është i hapur deri javën e ardhshme.
Ziyech ishte pranë huazimit te Parisi por lëvizja e tij dështoi në momentet e fundit për shkak të dokumenteve. 29-vjeçari nuk bën pjesë në planet e Chelseat dhe ekipi nga Londra është i gatshëm ta huazojë te Beshiktashi që ka shprehur interesim për shërbimet e tij.
Ziyech do të huazohet tek ekipi turk pa opsionin e blerjes, në mënyrë që në fund të sezonit të nxirret në shitje dhe t’i bashkohet ndonjë skuadre më të madhe evropiane.
Ai ka kontratë me Chelsean deri në vitin 2025, ndërsa këtë sezon ka vetëm një asistim në 15 paraqitje.
