Trajneri Pep Guardiola pranon se Manchester City duhet të gjejë një mënyrë për ta përfshirë sulmuesin Erling Haaland më shumë pasi norvegjezi u reduktua në një rol periferik në humbjen 2:1 në derbin e qytetit ndaj Manchester Unitedit, të shtunën. Haaland, i cili pati vetëm 19 prekje të topit në stadiumin “Old Trafford” dhe ishte i kufizuar në gjysmë raste, tani ka shkuar në tri ndeshje pa gol pasi shënoi 27 herë në 21 paraqitjet e tijtë para me fanellën e Cityt. Pengimet e fundit të Cityt kanë ndezur debatin nëse futja e sulmuesit të frytshëm e ka detyruar skuadrën të ndryshojë qasjen e saj pasi u mësua të funksiononte pa një sulmues të jashtëm gjatë dy sezoneve të fundit.
Ish-mesfushori i Cityt, gjermani Dietmar Hamann, shkroi në rrjetet sociale se skuadra e Guardiolës “ishte një ekip më i mirë pa Haalandin, edhe nëse ai shënon 40 gola këtë sezon”. Guardiola është ende duke punuar për të integruar transferimin e tij prej 60 milionë eurosh, i cili iu bashkua Cityt nga Borussia Dortmund në qershorin e vitit të kaluar.
“Për momentin jemi duke punuar në këtë proces, sepse kur skuadrat tërhiqen në 18 metra, është më e vështirë për Haalandin, por ne duhet ta gjejmë atë pak më shumë. Pra, po duhet ta shfrytëzojmë më shumë Haalandin dhe jemi duke e kërkuar mënyrën për ta përdorur ashtu siç duhet”, pranoi trajneri i Manchester Cityt.
City ka luftuar për qëndrueshmëri të rezultateve këtë sezon, veçanërisht që nga Kupa e Botës “Katari”, duke barazuar në shtëpi me Evertonin, përpara se të pësojë dy humbje rresht. Fillimisht, u mposht nga Southamptoni për t’u eliminuar në Kupën e Ligës, përpara se të pësojë edhe nga Unitedi në kampionat. Por Guardiola, kampioni në fuqi i të cilit është i dyti në Premier League, tetë pikë pas skuadrës së Arsenalit, refuzoi të fajësonte një ndryshim në sistemin të tij për të akomoduar Haalandin.
“Unë do të thosha se mospërputhja ishte në aspektin e rezultateve, por jo edhe të performancës”, tha ai. “Në përgjithësi, por jo kundër Southamptonit, ne ishim të qëndrueshëm në ndeshjet tona. Sigurisht që kundër Evertonit ne luajtëm më mirë, por ata patën një goditje në portë dhe ne barazuam. Ata na ndëshkuan në një mënyrë që kur më parë nuk ka ndodhur. Ne gjithmonë gjenim një mënyrë për të marrë rezultatet. Nëse luajmë mirë apo keq, ne gjithmonë e kemi pasur atë shans. Mendoj se kjo është forca jonë dhe ne duhet të përmirësohemi, por sa i përket performancës, mendoj se jemi të qëndrueshëm”.
City kaloi në epërsi në “Old Trafford” ndaj Manchester Unitedit, por Bruno Fernandes shënoi golin e barazimit dhe Marcus Rashford shënoi atë që rezultoi goli i fitores vetëm katër minuta më vonë. Por pavarësisht zhgënjimit nga rezultati dhe zhgënjimit me vendimin për të lejuar që goli i Fernandesit të qëndronte si i rregullt, Guardiola ishte shumë më i lumtur me paraqitjen.
“Ne ishim aty gjatë gjithë kohës, unë mund ta njoh ekipin tim”, tha ai. "Kjo është gjithçka që mund të them. Në Southampton isha i befasuar, pasi nuk e njihja ekipin tim. Por, ndaj Unitedit ishte e kundërta. Unë e njoh ekipin tim prej shumë e shumë vjetësh”.
Madje, trajneri spanjoll ka insistuar se City do të rikthehet fuqishëm për të luftuar në të gjitha frontet, përfshirë edhe Premier Leaguen për shkak se synimi është ta mbrojë titullin e kampionit.
© KOHA. Të gjitha të drejtat janë të rezervuara.
