Skuadra e Chelseat ka bërë ofertë zyrtare për sulmuesin e Francës, Marcus Thuram, ka njoftuar të martën “The Sun”.

Mësohet se londinezët i kanë ofruar pesë milionë euro Borussia Moenchengladbachut për lirimin e Thuramit gjatë këtij muaji.

Megjithatë, ekipi gjerman po kërkon të paktën dhjetë milionë euro, me gjithë që francezi ka kontratë deri në fund të këtij sezoni dhe ka refuzuar rinovimin me Gladbachun. 25-vjeçari ka treguar një formë fantastike këtë sezon te Gladbachu, ku në 17 ndeshje ka shënuar 13 gola dhe ka bërë 4 asistime.

Ai është pjesë e Gladbachut prej vitit 2019, ndërsa po kërkohet edhe nga Bayern Munichu, Juventusi, Interi e Manchester Unitedi.

Thuram ka edhe nëntë paraqitje me Përfaqësuesen e Francës.