Vendimi i presidentit Macky Sall për t'i dhënë bonus ekipit të futbollit të Senegalit për Kupën e Botës “Katari 2022”, pavarësisht se nuk e arriti objektivin e tij, ka shkaktuar zemërim për disa sportistë të tjerë në vendin e Afrikës Perëndimore. Përfaqësuesja e Senegalit, si kampion i Afrikës, kishte për detyrë të arrinte në çerekfinale të Botërorit, por u eliminua në 1/8 e finales pas humbjes 3:0 nga Anglia.
“Ne do t’i paguajmë plotësisht shpërblimet e kualifikimit për në çerekfinale për të gjithë delegacionin zyrtar”, njoftoi Sall pas eliminimit të Senegalit.
Bonuset e Kupës së Botës - të cilat dalin prej gati 23 milionë dollarësh të zhbllokuar nga Qeveria e Senegalit për t’i mbuluar kostot e Kupës së Botës - do të ndryshojnë në varësi të përfshirjes së 26 lojtarëve në të gjithë kampanjën, duke përfshirë kualifikimet. Megjithatë, ndërsa Sall po përpiqej të tregonte mbështetje për skuadrën ndërsa ecën përpara, disa ish-lojtarë dhe sportistë të tjerë senegalezë e kanë vënë në pikëpyetje lëvizjen.
“Nëse fiton, duhet të shpërblehesh, por nëse humb, duhet të mësosh prej humbjes”, tha ish-sulmuesi i Teranga Lions, Diomansy Kamara.
Pavarësisht natyrës së tij bujare, vendimi i Sall u prit edhe më pak në favor nga sportistët e sporteve të tjera, të cilët tradicionalisht duhet të luftojnë për të financuar pjesëmarrjen e tyre në gara.
Hamadel Ndiaye është një kampion senegalez i triatlonit që përpiqet të arrijë serinë botërore dhe të kualifikohet për Lojërat Olimpike, por pavarësisht se punon si kameraman në Londër për të mbuluar shpenzimet, ai shpesh nuk ka qenë në gjendje të përballojë fluturimet që do t'i mundësonin të merrte pjesë në gara.
“Së pari, u shqetësova kur dëgjova historinë për shumën e mirë të parave të zhbllokuara për të dërguar tifozët në Katar”, tha 26-vjeçari. “Në vitin 2019 dhe 2021, doja të merrja pjesë në një garë, por bileta e fluturimit për në Dakar ishte 850 dollarë dhe më duhej të paguaja 120 dollarë të tjera për biçikletën time si bagazh shtesë, por nuk mund ta përballoja këtë. Ndonjëherë duhet të presim deri në minutën e fundit për të ditur nëse mund të marrim pjesë apo jo”.
Pikëpamja e Ndiayet mbështetet nga atletja Sangone Kandji, e cila përfaqëson Senegalin në kërcim së gjati dhe thotë se situata të tilla po ndodhin shumë shpesh, duke i penguar atletët të shkojnë në vendet e ngjarjeve dhe duke ndikuar kështu në rezultatet e tyre.
“Këtë vit, në Lojërat e Solidaritetit Islamik, mbërritëm vonë në Konya dhe një nga atletët zbarkoi një ditë para garës së tij”, tha ajo.
Pas titullit të saj në kërcim së gjati në Kampionatin Afrikan të atletikës të mbajtur në qershor në Mauritani, Kandji shton se ajo u shpërblye me një “shumë modeste”. Olimpisti Ndeye Binta Ndiongue është një tjetër senegalez që lufton gjithashtu për të fituar jetesën, dhe i cili u pagua vetëm vitin e kaluar për bonuse të lidhura me rezultatet që datojnë më shumë se një dekadë, në vitin 2008.
“Këtë vit, unë fitova medaljen e bronztë në kampionatin afrikan dhe shpërblimet nuk kanë ardhur ende. Fondet për futbollin sjellin zhgënjim edhe nëse e kuptoj që sjell sponsorë dhe emocione në të gjithë vendin”, insistoi ai.
Sipas Ndiongues, një mbajtës i medaljes së artë për Senegalin në skermë shpërblehet afërsisht me 650 dollarë pas një titulli kontinental, një shumë që është dukshëm më e vogël se bonusi i premtuar për futbollistët. Përveç zhgënjimit për shpërblimet e dhëna për futbollistët, sportistët e tjerë janë gjithashtu vazhdimisht të shqetësuar nga vëmendja që i kushtohet futbollit në krahasim me sportet e tjera.
“Futbolli është prioriteti dhe të gjithë e dinë - të gjitha federatat afrikane vuajnë nga kjo”, këmbëngul Diongue. “Është pak e padrejtë”.
