Për Lionel Messin kjo do të jetë mundësia e fundit për ta fituar titullin e botës. Kylian Mbappe synon suksesin e brazilianit Pele, duke u bërë lojtari më i ri që ka fituar dy tituj bote. Argjentina e kërkon trofeun e parë që nga viti 1986, ndërsa Franca synon ta mbrojë titullin e fituar katër vjet më parë.
Dy përfaqësueset gjigante po shpresojnë ta fitojnë Kupën e Botës. Finalja e së dielës (16:00) është e pasur me histori. Edicioni i 22-të i Botërorit përfundon me një ndeshje të jashtëzakonshme dhe me dy ekipe të mëdha përballë njëra-tjetrës.
Momenti i Messit
A është Lionel Messi futbollisti më i mirë i të gjitha kohëve? Debati do të zgjasë përgjithmonë, sepse nuk mund të ketë kurrë një përgjigje përfundimtare. Disa - veçanërisht tifozët më të rinj të futbollit - mendojnë kështu, ndërsa të tjerë do të tregojnë që Pele dhe Diego Maradona janë më të mirët, veçanërisht sepse ata fituan Kupën e Botës, çmimi më i madh i futbollit. Kjo është arsyeja pse, për shumë njerëz, Messi ka nevojë të fitojë Kupën e Botës për t'u bashkuar me Pelen dhe Maradonan në skenën e lojtarëve më të mëdhenj. Argjentinasit do të ndaheshin mes Maradonas dhe Messit. Dhe ka pasur ngjashmëri të habitshme mes tyre, pasi Messi shfaq llojin e shkëlqimit të pamëshirshëm dhe shpirtit luftarak të treguar nga Maradona kur udhëhoqi ekipin drejt titullit në vitin 1986.
Messi po shkon në finalen e tij të dytë të Kupës së Botës, pasi ishte në ekipin humbës në vitin 2014 kur Argjentina u mposht nga Gjermania. A mund ta shfrytëzojë shansin e tij këtë herë në paraqitjen e tij të fundit në skenën më të madhe të futbollit?
Dy titujt të Mbappes?
Mbappe mund të mos e ketë fituar çmimin më të madh në futbollin e klubeve - Ligën e Kampionëve - por ai po e merr vëmendjen në lojën ndërkombëtare dhe është një fitore larg nga fitimi i njëpasnjëshëm në Kupë të Botës deri në moshën 23-vjeçare. Ai mund të barazojë arritjen e Peles në fitimin e dy Kupave të Botës?
Mbappe është superylli i fundit i futbollit, dhe po e udhëheq valën e re të talenteve në lojë pas 15 vjetësh dominimi nga Messi dhe Cristiano Ronaldo. Do të konsiderohet si një moment i vërtetë i daljes në skenë nëse Mbappe fiton Kupën e Botës në kurriz të Messit 35-vjeçar.
Titulli i tretë
Argjentina dhe Franca po kërkojnë të fitojnë Kupën e Botës për herën e tretë. Kjo do ta linte ekipin fitues në vendin e katërt në listën e të gjitha kohërave, pas Brazilit (pesë), Gjermanisë dhe Italisë (nga katër). Tre nga titujt e Gjermanisë u fituan nga Gjermania Perëndimore (1954, 1974 dhe 1990). Një fitore për Francën do të vuloste statusin e saj si përfaqësuese dominuese e kësaj gjenerate, me titujt e mëparshëm që erdhën në vitin 1998 dhe 2018. Argjentina fitoi titujt në vitin 1978 dhe 1986. Të dyja vendet fituan titullin e parë kur e organizuan turneun.
Tre trofetë e Deschampsit
Didier Deschamps ka fituar tashmë Kupën e Botës si lojtar (1998) dhe trajner (2018), si Mario Zagallo i Brazilit dhe Franz Beckenbaueri i Gjermanisë. As Zagallo dhe as Beckenbauer nuk e fituan atë dy herë si trajner, megjithëse Zagallo e arriti atë sukses dy herë si lojtar për t’u bërë tri herë kampion në karrierë. Historia bën thirrje pra për Deschampsin, i cili ishte mesfushor i zellshëm për shkak të aftësisë së tij për të mbytur sulmet e kundërshtarit dhe më pas për të kaluar topin thjesht për lojtarët më kreativë rreth tij. Pragmatizmi është gjithashtu çelësi i stilit të tij të stërvitjes, me Francën e njohur në Kupat e Botës 2018 dhe 2022 për mbrojtjen kompakte.
Në Rusi katër vjet më parë, Franca kishte mesatarisht 48 për qind të posedim të topit në ndeshje dhe mesatarisht gjashtë goditje në portë për ndeshje - e dyta më e ulëta në turne. Në Katar, Franca – e goditur nga dëmtimet e lojtarëve kryesorë – mund të mos ketë qenë skuadra më e mirë, por është më efikasja.
“Unë nuk jam personi më i rëndësishëm”, tha Deschamps. “Është ekipi francez”.
“Këpuca e Artë”
Katër lojtarë janë në garë për të fituar “Këpucën e Artë”, çmimi që i jepet golashënuesit më të mirë në Kupën e Botës. Sigurisht mes tyre janë Messi dhe Mbappe. Secili ka nga pesë gola deri më tani, një më shumë se sulmuesi i Argjentinës, Julian Alvarez dhe qendërsulmuesi francez Olivier Giroud. Sipas rregulloreve të turneut, nëse dy ose më shumë lojtarë janë të barabartë në gola dhe kanë luajtur të njëjtin numër ndeshjesh, ai me më shumë asistime merr çmimin. Grupi i studimit teknik i FIFA-s do të vendosë se çfarë llogaritet asistim. Nga katër lojtarët në garë, Messi aktualisht kryeson me tri asistime, një më shumë se Mbappe. Asnjë lojtar nuk ka shënuar më shumë se gjashtë gola në një Kupë Bote që kur sulmuesi brazilian, Ronaldo, shënoi tetë në vitin 2002.
© KOHA. Të gjitha të drejtat janë të rezervuara.
