Pasi në ndeshjen e parë u mposht 1:0 nga Zvicra, Kameruni kërkon fitoren e parë në Kupën e Botës në Katar. Kameruni të hënën prej orës 11:00 luan ndaj Serbisë në kuadër të Grupit G. Serbët, po ashtu, kanë humbur ndeshjen e parë. Shpëtuan me vetëm 2:0 në një ndeshje ku Brazili rreshtoi rastet dhe i mbajti thuajse në portë.

Edhe Serbia kërkon fitoren me shpresë për të kaluar grupin. Serbia të shtunën mori goditje edhe nga FIFA, që hapi procedurë disiplinore ndaj Federatës së saj, për shkak të shfaqjes së një flamuri provokues ndaj Kosovës në zhveshtore para ndeshjes me Brazilin.

Më 2 dhjetor, Kameruni luan me Brazilin, ndërsa Serbia me Zvicrën. Kështu që të dy përfaqësueset e shohin rastin e tyre në ndeshjen e së hënës.

“Jemi në situatë të vështirë”, ka thënë trajneri i Kamerunit, Rigobert Song, duke iu referuar humbjes 1:0 në ndeshjen e parë. “Tani na pret ndeshja vendimtare dhe jemi gati”.

Kameruni pritet të luajë me tre sulmues në ndeshjen e së hënës. Bryan Mbeumbo do të paraqitet në krahun e djathtë të sulmit, ndërsa në qendër pritet të jetë Eric Maxim Choupo-Moting. Në krahun e majtë pritet të luajë Karl Toko Ekambi.

Ekambi shënoi pesë gola në Kupën e Afrikës vitin e kaluar, ku Kameruni arriti deri në gjysmëfinale.

33-vjeçari Choupo-Moting ka shënuar ringjallje me Bayernin prej se Robert Lewandowski shkoi te Barcelona. Ka shënuar 11 gola në 16 ndeshje.

Selektori Song shpreson që Choupo-Moting do ta shënojë golin e 20-të për Përfaqësuese në ndeshjen ndaj Serbisë.

Andre-Frank Zambo Anguissa ishte zbulim në mesfushën e Napolit këtë edicion. Ai do të jetë çelësi në ndeshjen ndaj Serbisë. Humbja me shumë mundësi kupton eliminimin për secilën përfaqësuese, por Kameruni bazohet edhe në përvojën e selektorit Song. Si mbrojtës, ai i luajti 137 ndeshje për Kamerunin. Ishte në katër kupa të botës. Song ka kërkuar nga tifozët në Katar që t’u japin energji shtesë lojtarëve.

“Nuk kemi dhënë çdo gjë në ndeshjen e parë dhe jemi larguar me shumë keqardhje. Ndeshja e parë ishte mesazh i fuqishëm për ne. Mësuam se çdo gabim paguhet shtrenjtë në këtë nivel”, ka thënë mbrojtësi i djathtë i Kamerunit, Collins Fai.