Trajneri i Koresë së Jugut, Paulo Bento, pranoi se ka rrezik për golashënuesin e Premier Leagues të sezonit të kaluar, Son Heung-min, kur ai del në fushë me maskë në ndeshjen hapëse të Grupit H kundër Uruguait në Kupën e Botës. Son nuk ka luajtur që nga thyerja e gropëzës së syrit të majtë më 2 nëntor në një ndeshje të Ligës së Kampionëve ndërmjet Tottenhamit dhe Marseillet. Ai u përplas me mbrojtësin Chancel Mbemba.
“Ai e di, dhe ne e dimë, se pas këtij dëmtimi nuk mund të përjashtojmë ndonjë rrezik”, tha Bento.
Son dhe shokët e tij të skuadrës përballen me një skuadër fizike të Uruguait që ndërthur përvojën e sulmuesve veteranë Luis Suarez dhe Edinson Cavani – të dy duke u paraqitur në Kupën e tyre të katërt të Botës – me një mbështetje të lojtarëve të rinj premtues të udhëhequr nga Federico Valverde i Real Madridit. Bento i quajti seancat stërvitore me sulmuesin Son “normale”, por tha se testi vjen kur fillon ndeshja ndaj Uruguait. Kjo ndeshje zhvillohet të enjten prej orës 14:00.
“Ne do të shohim se si do të jetë Son para ndeshjes”, tha Bento. “Shpresojmë që ai të ndihet rehat në pjesën më të madhe të mundshme. Dhe ne do të përdorim strategjinë më të mirë gjatë lojës që ai të ndihet i qetë”.
Son ka shënuar 35 gola në 104 ndeshje ndërkombëtare, por duhet të ketë shqetësime se sa efektiv mund të jetë ndaj Uruguait- dhe cilat janë rreziqet e lojës me maskë në fytyrë, të cilën ai e ka mbajtur në stërvitje që kur mbërriti në Katar. Trajneri i Uruguait, Diego Alonso, u pyet nga një gazetar i Koresë së Jugut nëse do të përpiqej të përfitonte nga dëmtimi i Sonit.
“Përparësia e vetme që do të kemi këtu është futbolli ynë”, u përgjigj Alonso. “Ne do të përpiqemi të jemi më të mirë se ata dhe të përdorim lojtarët tanë. Pra, të mos përdorim ndonjë vështirësi tjetër në ekipin tjetër”.
Uruguai po përballet me një ndryshim brezash në fushë, me Suarezin dhe Cavaniin me gjasë në Botërorin e tyre të fundit. Të rinjtë personifikohen nga 24-vjeçari Valverde, i cili po shënon gola dhe asiston rregullisht. Lojtarët e Uruguait janë të famshëm edhe për përkushtimin e tyre ndaj përfaqësueses, të cilën trajneri Alonso e vlerësoi.
“Me shumë shpresë dhe shumë dëshirë”, tha Alonso për të përshkruar ekipin e tij. “Përparësi është përfaqësuesja. Kjo është ajo që i dallon uruguaianët; ata janë gjithmonë të fokusuar te përfaqësuesja”.
Të dy, Suarez dhe Cavani, nënshkruan me skuadra të reja për të siguruar që ata të kishin minuta të rregullta loje përpara Kupës së Botës. Cavani u transferua nga Manchester Unitedi te Valencia, ndërsa Suarez u kthye në klubin e tij të fëmijërisë Nacional pas një periudhe të suksesshme tek Atletico Madridi.
Suarez ka shënuar shtatë gola në Kupën e Botës, një më pak se rekordi kombëtar i Oscar Miguezit nga ekipi fitues i Kupës së Botës në vitin 1950. Ndryshime ka edhe në stol. Oscar Tabarez është larguar dhe zëvendësuar nga Alonso, i cili ka pak përvojë në këtë nivel. Tabarez udhëhoqi Uruguain në tri Kupa Botërore, por u largua në fillim të këtij viti pas një serie rezultatesh të dobëta. Ishte Tabarez ai që e çoi skuadrën në gjysmëfinale të Kupës së Botës 2010 në Afrikën e Jugut. Suarez është i njohur për disa incidente thumbuese në fushë. Në një ndeshje në Kupën e Botës 2018 në Brazil, ai kafshoi në shpatull mbrojtësin e Italisë, Giorgio Chiellini. Arbitri nuk e pa incidentin, por Suarez më vonë u pezullua nga të gjitha aktivitetet e lidhura me futbollin për katër muaj, u pezullua me nëntë ndeshje moslojë dhe mori një gjobë të majme.
© KOHA. Të gjitha të drejtat janë të rezervuara.
