Ballkani ka fituar ndaj Sivassporit turk dhe ka barazuar me Clujin rumun. Në fund Sivasspori fitoi grupin, ndërsa Cluji avancoi tutje prej vendit të dytë. Kampioni kosovar mbeti i fundit në grup në Ligën e Konferencës dhe u eliminua.
Rrugëtimi debutues i Ballkanit në Evropë përfundoi të enjten mbrëma në Cluj-Napoca të Rumanisë. Pësoi 1:0 nga skuadra e madhe e Rumanisë, Cluji, ndonëse në pjesën e dytë dominoi plotësisht. Edhe në ndeshje tjera Ballkani ka mbetur “duarthatë”, ndonëse është paraqitur mirë.
“Natyrisht që nuk jemi të kënaqur me vendin e fundit në grup. Sinqerisht kemi merituar shumë më tepër. Unë jam krenar me klubin, njerëzit që drejtojnë klubin, trajnerët dhe bashkëlojtarët. Kemi luajtur të barabartë me të gjithë, ndërsa në shumicën e ndeshjeve ishim dominues. Në përgjithësi jam i kënaqur me atë që kemi shfaqur, por jo edhe me rezultatet. E përsëris, kemi merituar shumë më tepër”, ka thënë të premten për KOHËN, kapiteni i Ballkanit, Edvin Kuç.
Pakkush mund ta ketë besuar se Ballkani do të mbetej në skenën evropiane deri në fillim të nëntorit.
Pas titullit të parë të Kosovës, Ballkani në raundin e parë kualifikues të Ligës së Kampionëve u ndal nga Zhalgirisi i Lituanisë. U zhvendos në Ligën e Konferencës, niveli i tretë i kupave evropiane dhe kaloi La Fioritan e San Marinos, Klaksvikun e Ishujve Faroe dhe Shkupin. Kështu arriti në fazën grupore, ndërsa ishte në grup të vështirë.
Fillimi ishte premtues, barazim 1:1 me Clujin, me gol të pësuar në minutën e 91-të.
Më pas erdhi paraqitja solide në humbjen 3:2 nga Slavia në Pragë. Shpresat u rritën me fitoren 4:3 ndaj Sivassporit në Sivas të Turqisë. Skuadra turke u hakmor më pas në Prishtinë duke fituar 2:1. Në “Fadil Vokrri” fitoi edhe Slavia, 1:0, ndërsa në mbyllje erdhi disfata në Rumani.
“Sigurisht që kemi mundur të merrnim shumë më tepër pikë. Në shumë ndeshje na ka munguar fati sportiv. Kemi pasur po ashtu shumë telashe me lëndime, ndërsa asnjë ndeshje nuk e kemi luajtur me ekip të kompletuar”, ka shtuar mesfushori Kuç. Ai ka munguar në disa ndeshje.
Ballkani ndeshjet si vendas i ka luajtur në Prishtinë, në mungesë të një stadiumi të denjë për Evropë në Suharekë.
“Mendoj që kemi prezantuar Kosovën dhe futbollin kosovar në mënyrën më të mirë të mundshme. Kemi dëshmuar që mund të matemi me të gjithë. Do të falënderoja gjithë tifozët tanë besnikë që ishim prej fillimit me ne. Po ashtu i falënderoj gjithë të tjerët që na kanë përkrahur”, ka thënë Edvin Kuç, 29-vjeçari nga Tuzi.
Ballkani është skuadra e parë kosovare që arriti në fazën grupore në kupat evropiane. Rrugës i janë rritur pretendimet, por në mbyllje kampanja mund të vlerësohet shumë e suksesshme.
“Tani i kthehemi kampionatit. Natyrisht synimi është ta mbrojmë titullin dhe që të përsëritet apo edhe të përmirësohet suksesi në Evropë. E kemi parë, por edhe e kemi dëshmuar se mund të rivalizojmë të gjithë. Ky është vetëm fillimi i rrugëtimit tonë. Ky klub do të rritet nga dita në ditë”, ka thënë kapiteni i ekipit suharekas.
© KOHA. Të gjitha të drejtat janë të rezervuara.
