Kosova U17 përfundon e fundit në grup në kualifikimet për “Euro 2023”
15:15
Kosova U17 përfundon e fundit në grup në kualifikimet për “Euro 2023”
Përfaqësuesja e Kosovës U17 në futboll, e ka mbyllur fazën kualifikuese për “Euro 2023” në pozitën e fundit.
Në ndeshjen e tretë dhe të fundit, “dardanët” e rinj barazuan 1:1 me Finlandën, të martën në stadiumin “Fadil Vokrri”.
Ndeshjet e Grupit të tetë kualifikues ku ishte edhe Kosova u luajtën në stadiumin “Fadil Vokrri” në Prishtinë dhe në “Zahir Pajaziti” të Podujevës.
Golin për Kosovën e shënoi Luan Lleshi nga penalltia në minutën e gjashtë.
Në fakt përfaqësuesja kosovare ishte afër fitores, por tre minuta para fundit, zëvendësuesi Aapo Bostrom barazoi rezultatin në 1:1.
Përveç barazimit me Finlandën U17, Kosova ka humbur nga Italia 5:2 dhe Greqia 5:0.
Me një pikë, Kosova eliminohet në fazën e parë kualifikuese për Evropianin e vitit 2023.
Në vitin 2021, Kosova U17 e kishte kaluar fazën e parë, duke u kualifikuar deri në “Elit Round”, por më pas pësoi tri humbje për tu eliminuar këtë vit.
14:06
Futboll, Kosova U17 në epërsi pas pjesës së parë
Përfaqësuesja U17 e Kosovës në futboll po avancon pas pjesës së parë ndaj Finlandës me rezultatin 1:0.
Golin e vetëm në këtë ndeshje që po luhet në stadiumin “Fadil Vokrri” në Prishtinë gjatë 45 minutave të para, e ka shënuar Luan Lleshi nga penalltia në minutën e gjashtë.
Kjo ndeshje i takon Grupit 8 të fazës së parë kualifikuese për Kampionatin Evropian të vitit të ardhshëm.
Dy ndeshjet e para, me Italinë dhe Greqinë, Kosova i ka humbur. Kjo është ndeshja e fundit në grup.
