Kosova synonte vendin e parë në grup dhe avancimin në Ligën B të Ligës së Kombeve. Por tani i duhet ta konfirmojë vendin e saj në Ligën C të Ligës së Kombeve të UEFA-s. Humbja nga Irlanda e Veriut dhe fitorja e Qipros ndaj Greqisë e kanë bërë shumë të hapur garën për pozitën e dytë dhe të tretë në grupin e dytë. Greqia tashmë ka siguruar vendin e parë në grup dhe promovimin në Ligën B për edicionin e ardhshëm.
Greqia i ka 12 pikë nga pesë ndeshje. Kosova është e dyta me gjashtë pikë, ndërsa Irlanda e Veriut dhe Qiproja i kanë nga pesë pikë në pozitat tre e katër. Pozita e katërt në fund dërgon në plejautin për mbetje në Ligën C, përkatësisht për të shmangur rënien në nivelin inferior që paraqet Liga D.
Të martën prej orës 20:45, Kosova e pret Qipron, ndërsa Greqia e pret Irlandën. Kosova me fitore siguron vendin e dytë, ndërsa me barazim siguron të paktën vendin e tretë. Por humbja, varësisht edhe nga rezultati i ndeshjes në Athinë, mund ta dërgojë në vendin e katërt. Dhe ky do të ishte hap shumë i madh prapa për “Dardanët”.
Kosova natyrisht vlerësohet favorite e madhe ndaj Qipros. Cilësia e lojtarëve të Kosovës është më e madhe se e atyre të Qipros. Kosova kishte fituar 2:0 ndaj Qipros më 2 qershor në Larnaca, në hapje të edicionit të tretë të Ligës së Kombeve. Valon Berisha dhe Edon Zhegrova kishin shënuar golat, ndërsa ata nuk janë në këtë grumbullim.
Humbja e së shtunës mbrëma nga Irlanda e Veriut (2:1), me gola të pranuar në minutën e 82-të dhe të 93-të, është pritur rëndë te Kosova. Dhe rrjedhimisht Përfaqësuesja nuk do të jetë në momentin më të mirë në ndeshjen e së martës, që edhe është e rëndësishme tashmë. Ndërkohë qipriotët vijnë në Kosovë të trimëruar pas fitores 1:0 ndaj Greqisë. Është diskutabile nëse Greqia ka dhënë maksimumin në këtë ndeshje, marrë për bazë faktin se tashmë ka siguruar vendin e parë në grup e po ashtu raportet që i ka me Qipron. Por fitorja në Larnaca bën që Qipro të paraqitet e trimëruar të martën në Prishtinë.
Ekipin qipriot pas fitores ndaj Greqisë e ka uruar kryetari i Federatës qipriotë, Giorgos Koumas.
“Ai ka kërkuar përpjekje maksimale të martën ndaj Kosovës për të mbyllur paraqitjen në Ligën e Kombeve në mënyrën më të mirë”, ka njoftuar Federata e Futbollit e Qipros.
Në postin e selektorit të Qipros në ndeshjen ndaj Greqisë ka debutuar gjeorgjiani Temur Ketsbaia. Ai e njeh shumë mirë futbollin qipriot pasi ka punuar në këtë vend për kohë të gjatë. Dhe Ketsbaia mund të ketë sjellë frymë të re te Qipro.
“Jam krenar dhe i lumtur për rezultatin. Kemi pasur shumë dëshirë për fitore dhe kjo natyrisht është e mirëseardhur. Fitorja është korrekte. Nuk e kemi lejuar Greqinë që të na rrezikojë, pos në disa raste. Lojtarët i janë përmbajtur planit dhe jam shumë i lumtur me atë që kam parë. Ky ekip mund të arrijë shumë në të ardhmen. Jam i lumtur që kam zgjedhur Qipron. Kemi pasur mbrojtje solide, ishim të bashkuar si ekip, kemi sulmuar dhe kundërsulmur dhe në fund ishim të suksesshëm. Vazhdojmë përpjekjet tona për të mbetur në divizion”, ka thënë Ketsbaia.
Në njoftimin për udhëtimin e së dielës për në Prishtinë, Federata e Futbollit e Qipros ka shkruar se synimi është që të merret rezultat më i mirë se që do të marrë Irlanda e Veriut ndaj Greqisë.
“Me fitore eventuale ndaj Kosovës mund të përfundojmë në vendin e dytë në grup”, shkruajnë qipriotët.
© KOHA. Të gjitha të drejtat janë të rezervuara.
