Pas eliminimit me Bosnjë-Hercegovinën në fazën e grupeve të Eurobasketit, javën e shkuar, trajneri Adis Beqiragiq është kthyer në Suharekë për ta vazhduar punën te skuadra e Golden Eagle Yllit.

Beqiragiq të hënën ka nisur punën te kampioni në fuqi i Kosovës, pasi më herët nuk ka mundur për shkak të angazhimeve te Përfaqësuesja e Bosnjës, ku e kishte rolin e përzgjedhësit. Me Bosnjën, Beqiragiq përfundoi i pesti (i parafundit) në Grupin B të Eurobasketit, ndeshjet e të cilit u zhvilluan në Koeln të Gjermanisë. Në pesë ndeshje të luajtura, Beqiragiq udhëhoqi Bosnjën drejt dy fitoreve. Triumfoi ndaj Hungarisë (95:85) e Sllovenisë (97:93), ndërsa pësoi nga Gjermania (92:82), Franca (81:68) dhe Lituania (87:70) për të mos avancuar në fazën nokaut. Sidomos fitorja ndaj kampiones aktuale, Sllovenisë, u vlerësua lart. Por Bosnja në përgjithësi shfaqi ndeshje të mira në Eurobasket.

Beqiragiq të hënën ka mbajtur stërvitjen e parë me Yllin, ndërsa të martën për KOHËN tha se ekipit i duhet edhe pak kohë për të qenë gati.

Ylli e nisi edicionin 2022/23 në Superligën e Kosovës me humbje nga Rahoveci (90:88) në palestrën “Mizahir Isma”. Ekipi u drejtua nga ndihmësit e Beçiragiqit.

“Jam kthyer tek Ylli dhe kam nisur menjëherë punën. Mendoj se ende nuk jemi të gatshëm dhe na duhen të paktën edhe 4-5 xhiro të tjera për të qenë gati dhe për t’u komponuar për lojë. Gjithashtu na duhet të paktën edhe një lojtar që ta sjellim në ekip. Duhet të angazhohemi për të gjetur të paktën edhe një lojtar vendor që ta kompletojmë ekipin dhe të jemi gati”, ka pranuar Beqiragiq.

Përkundër që Yllit i duhet edhe pak kohë dhe konkurrenca këtë edicion është më e fortë se sezonin e shkuar, Beqiragiq është i bindur se ekipi i tij do ta mbrojë titullin e kampionit. Ylli në dy edicionet e fundit e ka fituar titullin me trajnerin boshnjak, i cili ka vlerësuar të gjitha ekipet e tjera dhe ka thënë se secila ndeshje këtë edicion do të jetë e fortë dhe interesante, me finish dramatik.

“Mendoj se këtë vit liga është shumë më e fortë dhe më cilësore. Po ashtu, secila ndeshje do të jetë derbi dhe tejet e vështirë për shkak se konkurrenca është e fortë. Kanë ardhur edhe më shumë trajnerë të mirë dhe lojtarë cilësorë. Nuk duhet harruar se edhe skuadrat si Trepça, Prishtina, Bashkimi e Peja kanë rritur buxhetin dhe janë bërë shumë të forta”, ka pranuar Beqiragiq. “Kjo do të thotë se nuk do ta kemi aspak të lehtë mbrojtjen e titullit, që edhe e kemi synim. Mirëpo, besoj se në fund të sezonit do të jemi në gjendje sërish të dalim kampion të Kosovës”.

Beqiragiq pranoi se pas eliminimit të Bosnjës në Eurobasket nuk i kanë munguar ofertat, por shtoi se është kthyer tek Ylli për ta respektuar kontratën. Ai vitin e shkuar firmosi edhe për dy vjet me klubin nga Suhareka, ku thotë se është i kënaqur me kushtet dhe gjithçka tjetër. Përvojën në Eurobasket, Beqiragiq e quajti të jashtëzakonshme dhe zbuloi se ka marrë lëvdata, jo vetëm nga njerëz të basketbollitm, por edhe kundërshtarët e tij për lojën që e tregoi Bosnjë-Hercegovina.

“Jam i kënaqur me kushtet që i kam tek Ylli, ekip me të cilin kam kontratë. Jam profesionist edhe pse gjithçka mund të ndodhë, pasi askush nuk e di të ardhmen. Megjithatë, unë ndihem mirë këtu dhe për këtë arsye jam kthyer tek Ylli për ta vazhduar punën dhe për ta respektuar kontratën që e kam me klubin”, u shpreh ai. “Sa i përket pjesëmarrjes në Eurobasket, mund të them se bazuar në reagimet e njerëzve që kemi qenë aty, me Bosnjën e kemi luajtur basketbollin më të mirë në këtë turne. E me lojën e treguar edhe e kemi merituar të futemi në mesin e tetë ekipeve më të mirë dhe këtë e kanë pranuar edhe trajnerët e ekipeve kundërshtare me të cilët jemi përballur. Fitorja ndaj Sllovenisë ishte madhështore. Të gjithë kanë thënë se kemi bërë një punë të mirë dhe kemi luajtur mirë, por humbja nga Gjermania ku jemi dëmtuar në dy raste, mund të them se na kushtoi shumë. Në fund të fundit, ky ishte fati ynë. Mund të them se jam i kënaqur me përvojën time në Eurobasket dhe me atë që kemi treguar me ekipin në përgjithësi”.

Krahas ndeshjeve në Superligën e Kosovës, Ylli po përgatitet edhe për debutim në arenën ndërkombëtare. Ekipi suharekas do të paraqitet në turneun kualifikues të Ligës së Kampionëve, i cili zhvillohet në fund të këtij muaji në Lisbonë të Portugalisë. Ylli në çerekfinale do të përballet me Benfican, ndeshje kjo që zhvillohet më 21 shtator. Në rast se e kalon këtë pengesë, atëherë në gjysmëfinale do të luajë kundër Keravnosit të Qipros, ku fituesi i këtij dueli do të përballet në finalen e 25 shtatorin me fituesin e gjysmëfinales tjetër ndërmjet Budivelnyk/Norrkoping – Bamberg.

Trajneri Beqiragiq nuk e ka shumë mendjen të Championsi, pasi ka insistuar se fokusi i tij është në kampionatin e Kosovës.

“Pjesëmarrja në Champions është shpërblim për mundin që e kemi bërë gjatë dy sezoneve të fundit, në të cilët e kemi fituar titullin e kampionit. Mbi të gjitha shpërblim për ekipin dhe qytetin që të paraqitet në një kupë evropiane”, u shpreh Beqiragiq. “Mirëpo, fokusi kryesor është në Superligë, pasi synimi është që të luajmë sa më mirë dhe të kemi sukses. Sa i përket kupës evropiane, është vetëm një shpërblim për të gjithë punën që e kemi bërë deri më tani”.