Ka pasur dyshime nëse shahistëve të Kosovës do t’u lejohet pjesëmarrja në Olimpiadën e 44-t të shahut që këtë javë përfundoi në Indi. Por Kosova mori pjesë, ndërsa shahistët në Indi kishin një nga përvojat më të veçanta deri më tani. Kështu tregon Nderim Saraçi, shahisti më i mirë në Kosovë. Ai ishte një nga pesë anëtarët e familjes Saraçi nga Mitrovica që ishin pjesë e përfaqësueses së Kosovës në Olimpiadën e Shahut të mbajtur në Chennai prej 28 korrikut deri më 9 gusht.
Olimpiada është ngjarja më e madhe e shahut dhe zhvillohet për ekipe përfaqësuese. Këtë vit morën pjesë 937 shahistë dhe 800 shahiste. Te shahistët fitoi Uzbekistani, ndërsa te shahistet fitoi Ukraina.
Nderim Saraçi më 13 korrik përmes një postimi e kishte vlerësuar të papranueshme që Olimpiada e shahut të organizohet në një vend që nuk ua mundëson të gjithëve pjesëmarrjen.
“15 ditë para fillimit, ne si vend ende nuk e dimë nëse do të na lejohet pjesëmarrja. Kjo situatë është e papranueshme, ndërsa shpresojmë për mrekulli që situata të ndryshojë në ditët e ardhshme”, kishte shkruar Saraçi para një muaji.
Kishte pasur raportime më pas që paraqitja e Kosovës nuk do të jetë e njëjtë me të vendeve të tjera, përkatësisht që autoritetet në Indi nuk do ta lejojnë shfaqjen e flamurit të Kosovës. Në të kaluarën, India nuk ka lejuar paraqitjen e sportistëve kosovarë në ngjarjet e mbajtura në këtë vend. Viktimë e diskriminimit ishte boksierja Donjeta Sadiku.
Shahistët, ndërkohë, udhëtuan, morën pjesë në garë dhe janë kthyer me përshtypjet më të mira.
“Para se të niseshim për në Indi të gjithë ishim pesimistë dhe i kishim rezervat tona sa i përket Indisë. Mirëpo, me marrjen e vizës me procedurë të shpejtë në konsullatën e Indisë në Stamboll, e kuptuam që gjithçka do të jetë shumë mirë. Kjo u vërtetua edhe me shkuarjen tonë në Indi. E kuptuam se India do të jetë një nga përvojat tona më të mira, me një pritje madhështore që na është bërë”, ka thënë Nderim Saraçi për KOHËN.
Shahistët e Kosovës kanë pasur Olimpiadë modeste.
“Ne e përfunduam garën në vendin e 87-të nga 187 shtete gjithsej. Kishim pesë fitore, pesë humbje e një barazim. Në total mblodhëm 11 pikë”, ka shtuar Saraçi.
Olimpiada në Indi ishte e rëndësishme edhe në aspektin personal për Nderimin.
“Deri te xhiroja e gjashtë gjithçka shkonte shumë mirë për mua. Në atë moment i kisha katër fitore e dy barazime. Mirëpo, në xhiron e shtatë e pësova një humbje dhe turneu mori kahe tjetër. Gjithsesi mund ta vlerësoj garë të suksesshme, sepse arrita rejtingun live 2503, që ishte një nga kriteret për titullin kryemjeshtër i shahut. Tani më duhen edhe dy norma që ta marr titullin kryemjeshtër”, ka thënë Saraçi, që aktualisht mban titullin mjeshtër ndërkombëtar i shahut.
Te femrat, Kosova u rendit e 109-ta, ndërsa morën pjesë 162 vende. Gjithsej shahistet i mblodhën dhjetë pikë nga 11 përballje.
Saraçi thotë se sa i takon prezantimit nuk ka pasur ndonjë telashe, se Kosova ishte e barabartë me të gjitha shtetet e tjera.
“Olimpiada është përvojë e veçantë dhe çdo shahist mburret që është olimpist dhe që ka shanse ta përfaqësojë vendin e tij në Olimpiadë. Edhe unë shpresoj që kjo përvojë në Olimpiadë do të më ndihmojë në vazhdim, duke ditur që në Olimpiadë garojnë shahistët më të mirë në secilin vend”, ka thënë Nderim Saraçi.
Pos tij nga familja Saraçi ishin edhe Korabi, Ndriqona, Rinesa e Nita. Pra, gjysma e ekipit.
“Ishte ndjenja më e mirë që gjysma e ekipit është nga familja jonë”.
Kosova nga viti 2015 garon në ngjarjet ekipore të shahut. Ka përvojë në disa Olimpiada tashmë, duke përfshirë edhe dy virtuale të mbajtura në pandemi. Ndërkohë suksesi më i madh u arrit në vitin 2018, kur shahistët e Kosovës ishin në vendin e 78-të me 12 pikë, përkatësisht me gjashtë fitore e pesë humbje.
© KOHA. Të gjitha të drejtat janë të rezervuara.
