1 perditesime
Sport

Shkupi ndalet edhe në Ligën e Evropës, vazhdon në Ligën e Konferencës

Shkupi ndalet edhe në Ligën e Evropës, vazhdon në Ligën e Konferencës
22:56

Shkupi ndalet edhe në Ligën e Evropës, vazhdon në Ligën e Konferencës

Pas Ligës së Kampionëve, Shkupi të martën mbrëma është përshëndetur edhe nga Liga e Evropës. Dhe tani kampioni shqiptar i Maqedonisë së Veriut vazhdon garimin në Ligën e Konferencës, nivelin e tretë të garave evropiane për klube të futbollit.

Shkupi të martën mbrëma u mposht si vendas nga Shamrock Rovers i Irlandës me shifrat 2:1. Shkupjanët e kishin humbur ndeshjen në Dublin me shifrat 3:1. Dhe kështu nuk kanë mundur të avancojnë tutje.

Shkupit i është dashur të martën fitore me dy gola dallim për të siguruar vazhdimet. Por ishte larg prej saj, përkundër përkrahjes së madhe që kishte nga tribunat, përkatësisht nga tifo-grupi “Shvercerat”.

Shamrocku kaloi në epërsi 1:0 në minutën e 65-të. Rory Gaffney ishte realizator. Pas goditjes së tij, topi u devijua dhe shkoi mbi portierin e Shkupit, Kristijan Naumovski.

Kapiteni i Shkupit, Naumovski, reagoi keq në minutën e 85-të, duke i mundësuar rezervistit Aidomo Emakhu që të shënoi në portë të zbrazët për 2:0. Fare në fund, në minutën e 94-t, Shkupi shënoi golin e vetëm. Sundat Adetunji ishte realizator.

Shamrocku me rezultat bindës, 5:2, avancon në raundin e plejofit të Ligës së Evropës. Ndërkohë Shkupi bartet në plejofin e Ligës së Konferencës. Dhe mund të përballet me Ballkanin e Suharekës, nëse skuadra kampione e Kosovës e kalon Klaksvikun të enjten në Ishujt Faroe. Ballkani ndeshjen e parë e kishte fituar 3:2.

Si kampion i Maqedonisë së Veriut, Shkupi ka nisur kampanjën evropiane në raundin e parë kualifikues të Ligës së Kampionëve. E kaloi Lincolnin e Gjibraltarit me rezultatin e përgjithshëm 3:2. Në raundin e dytë përballë e kishte gjigantin kroat, Dinamo Zagreb. Me Dinamon, shkupjanët i luajtën dy ndeshje të forta. Në Zagreb barazuan 2:2, por më pas pësuan 1:0 në shtëpi dhe u eliminuan nga Championsi.

Ndaj Shamrockut, Shkupi nuk ka pasur forcë për të përsëritur paraqitjet që i kishte ndaj Dinamos. Dhe kështu zhvendoset në Ligën e Konferencës dhe potencialisht mund të paraqitet edhe në Prishtinë.

22:26

Shkupi po pëson 1:0

Shkupi është duke humbur nga Shamrocku i Irlandës, në ndeshjen e kthimit të raundit të tretë kualifikues të Ligës së Evropës.

Shamrocku ka kaluar në epërsi 1:0 në minutën e 65-të. Rory Gaffney gjuajti nga distanca, ndërsa topi pas devijimit, paraboloi portierin e Shkupit.

Shkupi kishte humbur 3:1 ndeshjen e parë në Irlandë.