Batatina: Llapi nuk aplikon strategjinë me dy kontrata

Trajneri i Llapit, Tahir Batatina, ka thënë se ai asnjëherë nuk aplikon strategjinë që me lojtarin të nënshkruajë dy kontrata.

Bataina ka thënë se atë kontratë që e dërgon në Federatën e Futbollit të Kosovës, ajo është edhe kontrata që e ka me lojtarin.

“Nuk kemi aplikuar me dy kontrata me funksionu. Kushtet që i ka lojtari te Llapi janë ato që figurojnë në kontratën në Federatë. Mund të bësh atë strategji me dy kontrata, por më pas mundet lojtari me të dërgu në gjyq e t’i merr mjetet financiare. E dimë se është e vështirë me u përballu. 6400 euro në muaj kemi obligime tatimore”, ka thënë Batatina.

Ai ka thënë se klubet po nguten duke transferuar lojtarë të huaj, pasi në fund talentet e zhvilluar në Kosovë po transferohen jashtë vendit, si rasti i Valmir Veliut që u tranasferua në Superligë të Turqisë te Gaziantepspori.

Batatina ka treguar se Veliu erdhi te Llapi me pagë mujore 300 euro, ndërsa u largua me pagë mujore 2000 euro.

Ndërkohë sa i përket deklarimeve të Abedin Zekës së Trepçës ’89 se i mban shkollë për zhvillim të lojtarëve të ri, Batatina ka thënë se do të shkojë në seminar nëse mban Abedini dhe është aq i zoti.

“Cili klubi i ka tre lojtarë me kartona në Evropë në liga të forta. Llapi i ka tre, është Valmir Veliu, Mirlind Daku e Ajdin Salihu”, ka thënë Batatina.

Batatina: Dritës edhe trenin t’ia bësh deri në Gjilan nuk mundet ta mbushë “Fadil Vokrrin”

Trajneri i Llapit, Tahir Batatina, ka thumbuar Dritën.

Batatina ka thënë se Dritës edhe nëse ia ofron trenin dhe i thua e ke falas nuk mundet me e mbush stadiumin “Fadil Vokrri” në Prishtinë.

“S’mundet Drita edhe me u qu krejt në këmbë, edhe trenin me ia bë deri Gjilan e me i thënë e kemi falas s’mundet me e mbush ‘Fadil Vokrrin’. Me pas tifozë e me mbushë janë dy botëkuptime tjera. 5 mijë tifozë me 12 mijë tifozë është dallim. Deshëm apo nuk deshëm, ‘Fadil Vokrrin’ s’mundet me mbushë asnjë klub, as Prishtina, pos Llapit. Në Prishtinë, 90 për qind e kanë në dorë Llapi”, ka thënë Batatina për “Sportin Total” në KTV. “Është më e ndërlidhur me Llapin, Prishtina dhe duhet me pranu këtë”.

Trajneri i Llapit, Tahir Batatina, ka thënë se janë shpifje lajmet se klubi i tij e ka të ndaluar transferimin e lojtarëve.

Ai për “Sportin Total” në KTV ka thënë se lajmet janë shpifje e disa portaleve e klube dhe se klubet po i frikësohen Llapit.

“Kemi kërkuar sqarime. Kur ke borxhe e ke të bllokuar merkaton. Nuk e kemi të bllokuar. Thonë se çdo gjë është ok, kemi regjistruar lojtarë edhe më herët edhe tash. Kemi kërkuar të gjejmë nga erdhi ky informacion, pasi nuk është i vërtetë që është bllokuar merkato. Janë direkt shpifje të një portali për qëllime të caktuara të dikujt. Dikush ka nisur të frikësohet ende pa nisur kampionati”, ka thënë Batatina.

Batatina: Për financa Llapi është kampion, rrogat lojtarëve u dalin me 28-in

Trajneri i Llapit, Tahir Batatina, ka thënë se klubi i tij nuk ka probleme financiare.

Për Sportin Total në KTV, Batatina ka thënë se Llapi është kampion në këtë aspekt.

“Sa i përket anës financiare, Llapi është kampion. Lojtarëve u dalin rrogat me 28-in të çdo muaji. Du ditë para se të bëhet fundi i muajit. Llapi se ka problem çështjen financiare, ka projekt afatgjatë. Nuk është ngutur në hapa qe sa vite, ka qenë i kujdesshëm në transferime, në menaxhim. Mund të bëhesh kampion, por pastaj bjen në ligën e tretë. Llapi ka shikuar hap pas hapi. Llapi ka arritur të bëhet ndër klubet më të organizuara në Kosovë”, ka thënë Batatina.

© KOHA. Të gjitha të drejtat janë të rezervuara.