Tri klube ukrainase të futbollit mësuan rrugët e tyre drejt garave evropiane të martën, në shortet e UEFA-s për plejofet e Ligës së Kampionëve, Ligës së Evropës dhe Ligës së Konferencës. Asnjë nga ekipet nuk do të jetë në gjendje të luajë ndeshje në shtëpi, për shkak të luftës me Rusinë. Me synimin për t'u bashkuar me Shakhtar Donetskun në fazën e grupeve të Ligës së Kampionëve, Dynamo Kievi do të duhet ta mposhtë Benfican ose Midtjylland në raundin e plejofit nëse avancon kaq larg.
Dynamo fillimisht duhet të luajë me Sturm Grazin në raundin e tretë kualifikues. Skuadra ukrainase do ta presë ndeshjen e parë të mërkurën në Poloninë fqinje. Në Ligën e Evropës, Dnipro-1 hyn në fazën e plejofit dhe shorti përcaktoi të martën të përballet me Partizanin e Beogradit ose AEK Larnacan. Dnipro-1 do ta presë ndeshjen e parë më 18 gusht, me gjasë në Sllovakinë fqinje.
Zyrtarët e UEFA-s shprehën shpresën për paqen në Ukrainë përpara çdo ceremonie të shortit në selinë e organit qeverisës të futbollit evropian. Klubet ukrainase nuk morën pjesë. UEFA ka ndaluar ekipet ruse nga të gjitha garat e saj. Dynamo dhe Dnipro-1 janë të sigurta se do të luajnë në fazën e grupeve të njërës prej garave evropiane në shtator, ku secili do të fitojë të paktën disa milionë euro në para nga UEFA.
Dynamo do të hyjë në fazën e grupeve të Ligës së Evropës nëse eliminohet nga Liga e Kampionëve dhe Dnipro-1 do të kalojë në Ligën e Konferencës, që është niveli i tretë i garave të UEFA-s nëse nuk del nga plejofi i Ligës së Evropës. Dnipro-1 është një klub i ri dhe i veçantë nga Dnipro, i cili ra në falimentim menjëherë pasi luajti në finalen e Ligës së Evropës në vitin 2015. Paratë janë të ardhura thelbësore për rindërtimin e klubeve, që kanë humbur lojtarët kryesorë dhe nuk kanë luajtur ndeshje të ligës ukrainase që nga dhjetori.
Liga ishte planifikuar të rifillonte pas pushimit dimëror më 25 shkurt, por u mbyll kur Rusia pushtoi vendin një ditë më parë. Liga më vonë u pezullua dhe nuk u dha asnjë titull, megjithëse UEFA pranoi pesë skuadrat më të mira në renditje, që të futen në garat e saj këtë sezon. Një sezon i ri i ligës do të nisë më 23 gusht në Ukrainën lindore me pak lojtarë nga vendet e tjera, që kanë mbetur me klubet e tyre.
Vendi i pestë, Vorskla Poltava u eliminua javën e kaluar në raundin e dytë kualifikues të Ligës së Konferencës nga klubi suedez AIK. Skuadra luajti ndeshjen e saj “në shtëpi” në Stokholm dhe do t’i fitojë 350,000 euro nga UEFA. Gjithashtu, Zorya Luhansk - i katërti në ligën ukrainase sezonin e kaluar - mund të përballet me Luganon ose Hapoel Beer-Sheva në plejofin e Ligës së Konferencës.
Zorya së pari duhet të luajë me Universitatea Craiovan në raundin e tretë kualifikues. Ndeshja e parë në “shtëpi” është planifikuar për të enjten në Lublin të Polonisë. Ekipet nga pesë ligat e mëdha të Evropës gjithashtu hynë në shortin e plejofit të Ligës së Konferencës. West Hami do të luajë me Viborg ose B36 Torshavn me ndeshjen e parë në shtëpi, Villarreali është fillimisht në shtëpi kundër Hajdukut të Splitit ose Vitorias, dhe Fiorentina pret ndeshjen e parë kundër Twentes ose Çukariqkit. Ndeshjet e para janë planifikuar për 18 gusht, ndërsa ndeshjet e kthimit janë caktuar për një javë më vonë.
Në plejofin e Championsit, fituesi i Kupës Evropiane në vitin 1988, PSV Eindhoven ose Monaco do ta presin klubin belg Union Saint-Gilloise ose Rangers, ndërsa Kopenhageni është në shtëpi në duelin e parë kundër Trabzonsporit. Ndeshjet e para do të luhen më 16 ose 17 gusht, ndërsa ndeshjet e kthimit do të zhvillohen më 23-24 gusht. Fituesit e plejofit do t'i bashkohen 26 skuadrave tashmë të kualifikuara - duke përfshirë Shakhtarin, i cili do të luajë ndeshjet në shtëpi në Varshavë - në shortin e fazës së grupeve të Champions, që tërhiqet më 25 gusht në Stamboll. Skuadrat humbëse kalojnë në fazën e grupeve të Ligës së Evropës. Shorti do të hidhet ditën e nesërme dhe përfshin Manchester Unitedin, Arsenalin dhe Romën.
© KOHA. Të gjitha të drejtat janë të rezervuara.
