Kampioni i Kosovës në basketboll, Golden Eagle Ylli, është ftuar nga Liga e Kampionëve që mbahet në kuadër të FIBA-s, për të aplikuar për pjesëmarrje në rundin kualifikues të kësaj gare për sezonin 2022/23, ka njoftuar Federata e Basketbollit të Kosovës.
Në njoftimin e FBK-së thuhet se Ylli tashmë e ka kompletuar dokumentacionin e kërkuar për pjesëmarrje në Ligën e Kampionëve, të cilin nëpërmjet Federatës e ka dërguar në departamentin e garave të kësaj lige prestigjioze.
Pjesëmarrja në edicionin e rregullt të Ligës së Kampionëve apo në rundet kualifikuese për çdo klub mbetet në kompetencat e bordit të kësaj lige, i cili do të konfirmojë listën përfundimtare të klubeve pjesëmarrëse deri të premten e ardhshme.
Skuadra e vetme nga Kosova që deri më tani është paraqitur në rundin e parë kualifikues të Championsit është Sigal Prishtina.
