2 perditesime
23:01

Ylli bindës në Mitrovicë, është një fitore larg mbrojtjes së titullit

Golden Eagle Ylli ka bërë hap të madh drejt titullit të kampionit të Kosovës në basketboll. Ylli të enjten mbrëma në palestrën “Minatori” në Mitrovicë ka fituar bindshëm ndaj Trepçës vendase me rezultatin 60:46.

Palestra ishte e mbushur me shikues dhe Trepça kishte përkrahje të madhe. Por kjo nuk kreu punë ndaj Yllit që në parket shfaqi nivel dukshëm më të lartë. Tani skuadra nga Suhareka udhëheq 2:0 në serinë finale të plejofit. Është vetëm edhe një fitore larg titullit të kampionit. Ylli kishte fituar me shumë mund ndeshjen e parë në Suharekë, të dielën. Por të enjten dominoi plotësisht dhe mbajti epërsi të lartë që nga fillimi.

Ndeshja e tretë luhet në Suharekë, të dielën, dhe mund të jetë festive për Yllin.

Ylli vjet e kishte fituar titullin e parë, duke e mposhtur Pejën 3:0 në serinë finale të plejofit.

Ylli e nisi mirë ndeshjen, ndërsa çerekun e parë e fitoi me shifrat 22:6. Dhe nuk shikoi më prapa.

Dajuan Graf kishte shifrat më të mira te Ylli. Ai realizoi 11 pikë, tetë kërcime e shtatë asistime. Më efikasi ishte Henrik Shirko me 13 pikë, por që nuk kishte efikasitet të lartë. Ndërkohë Mikaile Tmushiq kontribuoi me 12 pikë e gjashtë kërcime.

Te Trepça dëshpëruan lojtarët bartës. Rodney Purvis shënoi vetëm katër pikë. Ai kishte plot nëntë tentime për dy pikë, ndërsa i qëlloi vetëm dy. Për tri pikë i kishte gjashtë tentime të pasuksesshme.

Drilon Hajrizi i realizoi tetë pikë. Qëlloi dy nga tetë tentimet për dy pikë dhe një nga katër tentimet për tri pikë. Qendra Andrew Gordon u dallua me 15 pikë e nëntë kërcime. Pikë dyshifrore realizoi vetëm edhe Mike Edwards – 10.

21:51

21 pikë epërsi për Yllin pas pjesës së parë

Golden Eagle Ylli po udhëheq bindshëm pas pjesës së parë të ndeshjes ndaj Trepçës.

Pas 20 minutave lojë në palestrën “Minatori” në Mitrovicë, Ylli po udhëheq me shifrat 39:18. Dajuan Graf po shkëlqen te Ylli me 11 pikë, tri kërcime e tri asistime. Te Trepça, statistikat e lojtarëve janë katastrofale. Rodney Purvis ka humbur të gjitha dhjetë gjuajtjet e deritashme.

Ai është ende pa pikë, njëjtë si Drilon Hajrizi.

21:27

Ylli po e shkatërron Trepçën në “Minatorin” e stërmbushur

Në palestrën “Minatori” të stërmbushur me shikues, po luhet ndeshja e dytë e finales së plejofit në Superligën e Kosovës në basketboll. Ndeshja ka nisur me gjysmë ore vonesë për shkak të vonesës së Golden Eagle Yllit.

Por vonesa nuk po reflekton në paraqitjen e skuadrës nga Suhareka. Ylli pas çerekut të parë është duke fituar bindshëm, 22:6. Suharekasit kanë dominuar plotësisht në 10 minutat e parë dhe tashmë kanë epërsi bindëse.

Ylli e ka fituar ndeshjen e parë finale.