Një vit pasi nënshkroi kontratën e parë profesionale me Eintracht Frankfurtin, portieri Diant Ramaj të martën nënshkroi një tjetër kontratë me kampionin e Ligës Evropiane.
Ramaj e ka vazhduar deri në vitin 2027 kontratën me Frankfurtin, klubin e madh gjerman. Portieri i dytë i klubit të Bundesligës u transferua verën e kaluar nga Heidenheimi. Ai fillimisht pati nënshkruar kontratë deri në vitin 2024, por klubi gjerman tani ia ka vazhduar kontratën deri në vitin 2027. Portieri 20-vjeçar debutoi në Bundesligë në vitin e tij të parë te Frankfurti.
Ramaj është krenar që ka vazhduar kontratën.
“Jam krenar që do të vazhdoj të vesh fanellën e Eintracht Frankfurtit. Është një klub i madh, një qytet i madh dhe një ekip i mrekullueshëm. Thjesht ndihem mirë”, ka thënë portieri i Përfaqësueses U20 të Gjermanisë.
Për U20 të Gjermanisë, Ramaj ka luajtur tri ndeshje, ndërsa pesë ndeshje i ka zhvilluar për U-19. Dy paraqitje i ka te U-18. Gjasat që ai të ftohet te U-21 e Gjermanisë janë të mëdha.
Ramaj luajti në barazimin kundër Augsburgut, më 16 janar. Kishte pësuar një gol, madje në krahun e tij. Por paraqitja e kosovarit ishte vlerësuar. Për guximin e shfaqur pati marrë lëvdata edhe nga trajneri i portierëve, Jan Zimmermann. Ndeshja pati përfunduar 1:1.
Ramaj karrierën e ka nisur te të rinjtë e një klubi të vogël gjerman. Për të rinjtë luajti edhe te Stuttgarti, Stuttgarter Kickersi dhe Heidenheimi. Te Heidenheimi luajti edhe në ekipin e parë, para se t’i bashkohej Frankfurtit.
Frankfurti ditë më parë fitoi Ligën e Evropës. Ramaj nuk ishte pjesë e ekipit në finale për shkak të një operimi.
Portieri me prejardhje nga Gjakova po kërkohet edhe nga Kosova. Nga vëllai i Diantit, Dijoni, ishte konfirmuar se janë në kontakt me Përfaqësuesen e Kosovës.
“Po kemi kontakt me Kosovën”, pati thënë Dijon Ramaj për KOHËN. Kontakti me familjen Ramaj ishte konfirmuar edhe nga drejtori i Përfaqësueses, Muharrem Sahiti.
Ramaj aktualisht i takon Gjermanisë.
© KOHA. Të gjitha të drejtat janë të rezervuara.
