Sport

Spanjolli Alonso: Në Kosovë ndihem shumë mirë, me Besën kërkojmë kualifikimin ndaj Turdas

 

Hendbollisti spanjoll, Victor Alonso, kompletoi edicionin e kaluar te Besa Famgas. Fitoi dy trofetë dhe dha kontribut edhe në ndeshjet evropiane. Gjatë verës majtaku 31-vjeçar u transferua në Izrael, por javë më parë papritur u kthye te Besa e Pejës.

Në ndeshjen e së dielës ndaj skuadrës rumune, Potaissa Turda, Alonso ishte prej më të mirëve. Realizoi pesë gola në fitoren 30:28 të Besës në ndeshjen e parë të raundit të tretë të Kupës Evropiane. Ndeshja e kthimit luhet sot në Turda të Rumanisë, nga ora 17:00. Me gjithë udhëtimin e gjatë prej 36 orësh, Besa synon ta eliminojë Turdan, kampionen e vitit 2018 të kësaj gare. Shumë pritet edhe nga Alonso, që ka disa ndeshje për Spanjën.