Ministri i Kulturës, Rinisë dhe Sportit, Hajrullah Çeku, ka dënuar vendimin e Serbisë për të mos lejuar boksierët e Kosovës që të marrin pjesë në Botërorin e boksit amator.
Çeku në një konferencë për media ka thënë se ky veprim shkelë të gjitha kartat ndërkombëtare sportive dhe ka paralajmëruar se do të ndjekë rrugët ligjore.
Ai u ka bërë thirrje Federatës Botërore të Boksit (AIBA) dhe Komitetit Olimpik Ndërkombëtar (KOK) që të dënojnë organizatorin, që është Serbia. E po ashtu u ka bërë thirrje ambasadave të huaja dhe Bashkimit Evropian që të reagojnë.
“Në emër të Qeverisë së Kosovës e dënojmë rëndë veprimin për ndalimin e pjesëmarrjes së boksierëve në Botëror. Konsiderojmë se ky veprim i organizatorit, është vendim i marrë nga direktivat të qeverisë serbe. Jam këtu sot para jush bashkë me përfaqësuesen tonë. Par dy ditëve MKRS-ja së bashku me Ministrinë e Punëve të Jashtme, kemi drejtuar kërkesë zyrtare në MKRS të Serbisë për të tërhequr prapa iniciativën e tyre për bllokimin e delegacionit kosovar për të hyrë në Serbi. Ftesën për pjesëmarrje e kemi parë nga Federata Botërore e Boksit e jo nga shteti i Serbisë. Kemi kërkuar reagim edhe nga ambasadat e shteteve në Kosovë që me autoritetin e tyre të ndërhyjnë”, ka thënë Çeku.
Boksierët kosovarë kishin tentuar tri herë të hynin në Serbi por nuk u lejuan. Nga Federata e Boksit të Serbisë është thënë se boksierët kosovarë nuk janë paraqitur fare për Botëror.
“Për MKRS-në është e patolerueshme mospjesëmarrja e ekipit në Botëror, e kjo krejt për shkak të qëndrimeve politike serbe kundër Kosovës. Kemi kërkuar reagim edhe nga BE-ja, që në të kaluarën është treguar shumë e kujdesshme për të reaguar, por për çudi nga BE-ja deri tash nuk kemi as edhe një reagim, për rast të pastër të shkeljes bazike të drejtave të boksierëve tanë. U bëjmë thirrje federatës ndërkombëtare të boksit dhe Komitetit Olimpik Ndërkombëtar për të reaguar e marrë masa ndaj organizatorit. Nëse nuk merren masat e duhura, obligohemi të trajtojmë e ndjekim rrugët ligjore kundër penalizimit të sportistëve tanë”, ka thënë Çeku.
