Shpejtim Bajoku vlerësohet shpresa më e madhe e Kosovës për medalje në Kampionatin Botëror të boksit amator që mbahet në Beograd prej 24 tetorit deri më 6 nëntor. Përfaqësuesja e Kosovës të shtunën në mëngjes pritet të arrijë në Beograd, ndërsa për herë të parë sportistë që përfaqësojnë Kosovën pritet të marrin pjesë në një ngjarje ndërkombëtare që mbahet në territorin e Serbisë.
Kosovën në Botëror do ta përfaqësojnë tre boksierë. Pos Shpejtim Bajokut është edhe vëllai i tij, Bashkim Bajoku, si dhe Patriot Behrami. Të tre debutojnë në ngjarjen më të madhe të boksit amator.
“Jemi në formë shumë të mirë. E falënderojmë Federatën që na ka qëndruar pranë dhe mund të them se kurrë më gati nuk kemi qenë. Kemi punuar në salla të mira dhe në kushte të mira. Ne jemi të përgatitur dhe kismet do të kthehemi me medalje. 90 për qind do të kthehemi me medalje nga Botërori”, ka thënë Shpejtim Bajoku të premten për KOHËN, pak para nisjes për në Beograd.
Në Botëror marrin pjesë 650 boksierë nga 105 shtete të ndryshme. Numri i pjesëmarrësve është rekord, ndërsa ky është Botërori i 21-të. Do të garohet në 13 kategori të ndryshme.
Boksi amator po lufton për të kthyer namin e dikurshëm dhe Botërori pritet të jetë pikë kthese. Emra të mëdhenj të ringut do të boksojnë në Beograd. Për herë të parë, AIBA ka paraparë të ndajë shpërblime financiare për fituesit. Fondi i përgjithshëm shpërblyes është 2.6 milionë dollarë. Fituesit e medaljeve të arta i marrin nga 100 mijë dollarë. Medalistët e argjendtë nga 50 mijë dollarë, ndërsa fituesit e medaljeve të bronzta nga 25 mijë dollarë.
“Konkurrenca është shumë e fortë. Më të mirët nga e gjitha bota do të jenë aty. Besoj se SHBA-ja dhe Rusia i kanë boksierët më të mirë. Por nuk jemi larg as ne. Është hera e parë për të gjithë ne që garojmë në Botëror. Është më ndryshe që Botërori mbahet në Beograd. Mbetet njëfarë historie dhe ne jemi të vendosur që në histori të hyjmë me medalje të fituar”, ka shtuar Bajoku, që është pjesë e klubit Gollaku.
Ai thotë se ka pasur mjaftueshëm meçe këtë vit dhe se është në formë. Tregon se për dy muaj kanë stërvitur intensivisht për Botëror.
“E kam fituar Ballkanikun këtë vit dhe mund të them që boksierët e tjerë nuk dallojnë nga ne. I kanë disa kushte më të mira për ushtrime, por asgjë tjetër. Ata i kanë dy duar, ne dy duar. Por më mirë të mos flas shumë. Për ne boksierët duhet të flasë paraqitja në ring. Aty ne e themi fjalën tonë”, ka theksuar Shpejtim Bajoku.
Ai falënderon edhe trajnerin Besim Brahimi. Sipas Bajokut, Brahimi, që tani është selektor i boksierëve, u ka qëndruar afër dhe i ka përkrahur me të gjitha.
“Në fund në ring jemi një kundër një dhe krejt varet se si paraqitemi aty. Synojmë më të mirën”, ka thënë shpresa e madhe e boksit kosovar, Shpejtim Bajoku.
Botërori i boksit për herë të dytë mbahet në Beograd. Për herë të parë ishte mbajtur në vitin 1978, që ishte edicioni i dytë i ngjarjes më të madhe. Mehmet Bogujevci kishte fituar medaljen e argjendtë në kategorinë deri 63.5 kilogramë. Në këtë kategori suksesin e kërkon edhe Shpejtim Bajoku.
© KOHA. Të gjitha të drejtat janë të rezervuara.
