Manchester, 18 tetor (AP) – Kevin De Bruyne me të vërtetë dëshiron të luajë në një finale të dytë të Ligës së Kampionëve, sepse mezi e mban mend finalen e parë të tij. Mesfushori i Manchester Cityt pësoi thyerje të hundës dhe lëndim të syrit gjatë humbjes 1:0 nga Chelsea në finalen e luajtur në Porto në muajin maj, pasi u përplas me Antonio Rudigerin. I tronditur dhe i hutuar, De Bruyne kishte nevojë për ndihmë dhe u largua nga loja në minutën e 60-të për t’u dërguar në spital. Mesfushori belg tha të hënën se nuk mban mend asgjë nga momenti kur ndodhi përplasja deri kur ai u kthye në hotelin e ekipit të nesërmen, ende me dhimbje.
“Ishte ora rreth 10:00 e mëngjesit dhe unë ende e kisha të veshur fanellën e Cityt”, tha De Bruyne përpara kthimit në Belgjikë për ndeshjen e Grupit A, që City e luan kundër Club Brugget të martën. “Kjo është ajo që mbaj mend nga ajo finale”.
Ishte një mënyrë zhgënjyese për të shënuar ndeshjen më të madhe në nivel klubi në karrierën e tij, dhe De Bruyne hasi në dhimbje të tjera në Kampionatin Evropian një muaj më vonë pasi humbi ndeshjen e parë të Belgjikës në fazën e grupeve për shkak se ende nuk ishte rikuperuar nga lëndimi. Ai ishte qartë në siklet kur luajti në humbjen e Belgjikës ndaj Italisë në çerekfinale të “Euro 2020” dhe pas më shumë se tre muajve, De Bruyne insiston se e ka marrë veten mirë në aspektin fizik. Shënimi i golave në dy ndeshjet e tij të fundit në Premier League - kundër Liverpoolit dhe Burnleyt - është një shenjë se ai po kthehet në atë formë, që e ka bërë atë të votohet nga shokët e tij si lojtari i vitit i futbollit anglez, dy sezonet e fundit.
“Çdo ndeshje është më e mirë se ndeshja e mëparshme. Përveç golave dhe asistimeve, është dinamika dhe ritmi që Ke vini po i arrin duke luajtur rregullisht”, ka thënë trajneri i Cityt, Pep Guardiola. “Kevini është një djalë që duhet të jetë në formën më të mirë fizike për të shkëlqyer në fushë. Potenciali i tij është lëvizja e tij, si e sulmon hapësirën, si lëviz në fushë”.
City ende nuk e ka fituar Ligën e Kampionëve, pavarësisht shpenzimeve të mëdha të pronarëve nga Abu Dhabi që nga viti 2008, por është bërë i rregullt në fazat e fundit të këtij kompeticioni duke arritur në çerekfinale për tri sezone rresht para se të arrinte në finale për herë të parë. De Bruyne, i cili ka fituar Premier Leaguen tri herë me Cityn dhe nëntë trofe të mëdhenj në total, nuk beson se fitimi i Ligës së Kampionëve do të përcaktojë trashëgiminë e tij në klubin ku ai u transferua në vitin 2015 nga ekipi gjerman Wolfsburgu.
“Unë mendoj se njerëzit gjithmonë do të vendosin standardin gjithnjë e më lart, dhe për shkak të asaj që bëmë në Angli gjatë pesë-gjashtë vjetëve të fundit, njerëzit presin që ne të fitojmë Ligën e Kampionëve dhe kjo është ajo që ne duam të bëjmë”, tha ai. “Nuk them se do ta fitojmë, por gjithmonë do të konkurrojmë për ta fituar. Ne po përpiqemi dhe shpresoj që në periudhën time këtu do të marrim një trofe të tillë”.
City zë vendin e tretë në Grupin A të Championsit me tri pikë të mbledhura pas dy ndeshjeve të luajtura. Lider është Paris Saint-Germaini me katër pikë, i përcjellë nga Brugge që ka pikë të njëjta, por goldallim më të dobët.
