Qendërmbrojtësi Shkodran Mustafi ka insistuar se prej fillimit ka dashur t’i bashkohet Levantes, ekip me të cilin ka negociuar për një kohë të gjatë.

Mustafi, të enjten mbrëma u prezantua te Levante kurse të premten ka nisur stërvitjet individuale në palestër për t’u përgatitur që t’i bashkohet grupit.

29-vjeçari te Levante u transferua si lojtar i lirë dhe me ekipin nga La Liga, firmosi kontratë dyvjeçare, me mundësi vazhdimi edhe për një vit tjetër.

“Me Levanten kemi folur për një kohë të gjatë dhe prej momentit të parë më ka pëlqyer ideja që t’i bashkohem këtij ekipi. Pra, Levante ishte zgjedhja ime e parë”, është shprehur Mustafi.

“Unë jam punëtor i madh. Nuk kam shumë talent, por punoj shumë. Për këtë arsye menjëherë kam nisur stërvitjet që të jem gati”.

Ai gjithashtu me padurim pret që të luajë dhe insiston se adaptimin nuk e ka aspak të vështirë. Mustafi e njeh qytetin, pasi ka luajtur te Valencia për tri sezone dhe po ashtu e di gjuhën spanjolle.

“Me padurim pres të stërvitem me ekipin dhe të luaj. Po ashtu, dua t’i takoj edhe tifozët dhe do të mundohem ta ndihmoj ekipin që të ngjitet sa më lart”, ka thënë Mustafi, i cili krahas Valencias, karrierë ka bërë edhe te Sampdoria, Arsenali e Schalke.

Pas tri xhirove të luajtura këtë sezon në La Liga, skuadra e Levantes ka tubuar dy pikë.