Sport

Gjilani kërkon fitoren në Drenas, për ta mbajtur hapin për titull

Gjilani kërkon fitoren në Drenas, për ta mbajtur hapin për titull

Pas barazimit të fundit në shtëpi, skuadra e Gjilanit në duelin ndaj Feronikelit nuk ka opsion tjetër veç fitores, për të mbajtur hapin për titullin e kampionit. Gjilani në duelin e fundit luajti baras me Llapin (2:2), duke bërë një hap prapa në garën për titullin e kampionit. Ka mbetur në pozitën e katërt me 52 pikë të mbledhura, gjashtë më pak se Drita që prin në klasifikim. Deri në fund të këtij edicioni kanë mbetur edhe gjashtë xhiro të pazhvilluara, kurse Gjilani do të udhëtojë në Drenas për tri pikë. Dueli mes Feronikelit e Gjilanit zhvillohet të shtunën (sot) prej orës 17:00 në stadiumin “Rexhep Rexhepi” dhe i takon xhiros së 28-të të Superligës së Kosovës në futboll. Feronikeli renditet i pesti me 44 pikë.

“Ne do të dalim në fushë për ta fituar ndeshjen, pasi na duhet tri pikët për ta mbajtur hapin me kreun e tabelës, e po ashtu presim edhe ndonjë gabim të ekipeve tjera që na mundëson ngjitjen. Kështu që ne shpresojmë të kthehemi me tri pikë nga Drenasi, ndonëse nuk do të jetë aspak lehtë, për shkak se Feronikeli ka një ekip shumë të mirë”, ka thënë mesfushori i Gjilanit, Muhamed Useini.