Saviçeviqi thotë se Tumbakoviqi e tradhtoi Malin e Zi

Saviçeviqi thotë se Tumbakoviqi e tradhtoi Malin e Zi

11 July 2019 22:14

Kreu i Federatës së Malit të Zi, Dejan Saviçeviq, nuk po mund assesi ta pranojë veprimin e ish-seleksionuesit Lubisha Tumbakoviq, i cili pak orë para ndeshjes eliminatore për "Euro 2020" kundër Kosovës vendosi të mos e drejtojë ekipin.

Saviçeviqi të enjten në një intervistë për mediumet malaziase ka insistuar se Tumbakoviqi, i cili tash është seleksionues i Serbisë, e ka zhgënjyer shumë si në aspektin njerëzor ashtu edhe në atë profesional, transmeton Koha Ditore.

Tumbakoviqi nuk e udhëhoqi Malin e Zi në ndeshjen kundër Kosovës (1:1) në Podgoricë për shkak të presioneve nga Beogradi. Ai menjëherë u largua nga posti i trajnerit për të marrë drejtimin e Përfaqësueses së Serbisë.

"Në takimin që e kemi pasur me lojtarët, Tumbakoviq gati sa nuk qau dhe iu tha futbollistëve se i ka tradhtuar me këtë veprim. Kështu që, pas këtij veprimi të tij, Serbia ia ka kthyer favorin duke i dhënë mundësinë që të jetë seleksionues", është shprehur Saviçeviq. "Nuk mundet njeriu të bëhet patriot në momentet e fundit, sidomos pas thirrjes nga kabineti. Ai më ka zhgënjyer si njeri dhe profesionist, pasi veproi shumë ulët".

Saviçeviq ka thënë se Tumbakoviq ka mundur t'i thotë se nuk mund ta drejtojë Malin e Zi në ndeshjet kundër Kosovës qëkur është tërhequr shorti apo të paktën pas ndeshjeve të para eliminatore që u luajtën në muajin mars dhe jo të tërhiqet në momentin e fundit, siç ka vepruar.

© KOHA

Komentet

Shto koment

Të ngjashme