Sport

Ylli e Rahoveci vazhdojnë garën për pozitën e dytë

Ylli e Rahoveci vazhdojnë garën për pozitën e dytë
 

Golden Eagle Ylli e Rahoveci kanë fituar kryendeshjet e javës së 23-të për të vazhduar kështu garën mes tyre për pozitën e dytë në Superligën e Kosovës në basketboll. Rahoveci të shtunën e mposhti në Prizren kampionin aktual, Bashkimin me rezultatin 80:76, ndërsa të dielën Golden Eagle Ylli para tifozëve të vet në Suharekë fitoi ndaj Trepçës me rezultat 77:61.

Ylli aktualisht mban vendin e dytë me 39 pikë, ndërsa Rahoveci është i treti me 38 pikë. Pozita e parë tashmë është siguruar nga Z Mobile Prishtina, shkruan sot “Koha Ditore”. Vendi i parë dhe i dytë nuk luajnë në çerekfinale të plejofit dhe kalojnë direkt në fazën gjysmëfinale ku e kanë përparësinë e terrenit vendës. Rahoveci të enjten e pret Golden Eagle Ylli në ndeshjen që mund të jetë vendimtare për vendin e dytë në tabelë.