Projekt inovativ me pajisjet më të fundit të teknologjisë

Me kalimin e viteve edhe mësimi vetëm brenda faqeve të librit ka zënë të pësojë ndryshime.

Në ditët e sotme nxënësit e secilës klasë janë vetëm një klikim larg informatave që shpërndahen në hap me kohën.

Krejt ky avancim është si shkak i zhvillimit të pandalshëm të teknologjisë.

Pjesa më e madhe e shkollave në vend e shfrytëzojnë shumë këtë mundësi që ta rrisin cilësinë në mësim dhe interesimin e nxënësve.

Shkolla “Emin Duraku” në kryeqytet në kuadër të një projekti ka fituar një printer 3-dimensional, i cili po shfrytëzohet nga nxënësit për plotësim të njohurive.

Jo vetëm në lëndën përkatëse, teknologji, por edhe në të gjitha lëndët e tjera.

Arsimtari i teknologjisë, Sadik Vitia, me krenari tregon se sa interesim kanë nxënësit, e si i shkëmbejnë me njëri-tjetrin idetë më të veçanta e kreative.

“Jemi shkolla e vetme e cila e kemi fituar këtë projekt ne kuadër komune. Në këtë projekt marrin pjesë 20 nxënës, e këta nxënës kanë mësuar e kanë punuar gjëra të ndryshme me anë të printerit 3-dimensional.”

Kur nxënësit u njohën për herë të parë me një pajisje të tillë, dhe mësuan se si funksionon, interesimi iu shtua edhe për lëndët e tjera.

“Në fillim na ka ardhur si befasi kur e kemi kuptuar që jemi shkolla e parë që e kemi fituar këtë projekt dhe kur i kemi mbajtur trajnimet e kemi parë se kemi shumë interesim në këtë fushë.”

E që përpos njohjes me diçka të re, plotësimit të njohurive dhe bashkëpunimit, tashmë këta nxënës kanë gjetur edhe mënyra të tjera për ta ndihmuar shkollën e tyre.

Me këtë printer ata po punojnë aksesorë të personalizuar për t’i shitur me çmime modeste; të ardhura këto që shkojnë për nevojat e përditshme të shkollës.

Me vetiniciativë nxënësit që i kanë marrë këto njohuri do t’i bartin te gjeneratat më të reja, në mënyrë që ky të jetë një projekt i vazhdueshëm.