Nga klasa e dytë, nxënësit në hap me zhvillimet teknologjike

Mezi e mbajnë miun me duart e vogla, teksa i kodojnë robotët për të kryer funksione kreative.

Janë këta nxënës të ciklit të ulët në shkollën fillore “Nazim Gafurri” në Prishtinë.

Është hera e parë që në këto aktivitete po marrin pjesë nxënës nga klasa e dytë, të cilët ka vetëm një muaj prej kur u përfshinë në këtë klasë.

Me gjithë këtë periudhë të shkurtër kohore, vogëlushët kanë arritur që me shumë vullnet ta përvetësojnë teknologjinë informative.

Arktik Kastrati, nxënës i klasës së dytë, bashkë me shokët e tij, Diellin, Enisin e Lisjanin, vënë në lëvizje robotët duke përshkruar rrjedhshëm se si e arritën këtë rezultat.

Marrë parasysh faktin se ky është një aktivitet jashtëkurrikular, përpos nga arsimtari i teknologjisë dhe mësueses, ndihmë e instruksione marrin edhe nga shokët e ciklit të lartë.

Agnesa Vllasa vijon mësimet në klasën e 8-të dhe me shumë kënaqësi i ndan gjërat që i ka mësuar me më të vegjlit.

Jashtë orëve të rregullta në klasë qëndron edhe arsimtari Hajriz Abazi, vullnetin e merr pikërisht nga kjo gjeneratë shumë premtuese, siç i quan ai.

Përgatitjet i kanë filluar bashkë edhe për gara të ndryshme ndërkombëtare e vendore.

Ai nuk e lë pa e krahasuar kohën kur ai vetë ishte nxënës dhe mundësitë që nxënësit e tij i kanë tash.

Ndikimi për të mirë që këto aktivitete kanë vërehet edhe në arritjet e nxënësve në lëndët e rregullta.